Túrkistan oblysy Bas imamynyń orynbasary Muhamedjan Estemirov úsh júzdiń basyn qosqan qazaqtyń kórnekti tulǵasy Abylai hannyń qajylyq sapardaǵy ihram kiimin «Áziret Sultan» memlekettik tarihi-mádeni qoryq-mýzeiiniń qoryna tabystady.
Ihram kiim — Abylai han atynan jáne Mádine qalalaryna jasalǵan úlken qajylyq saparynda kiilgen.
Ózderińizge málim, 2015 jyly Qazaqstannyń Tuńǵysh Prezidenti-Elbasy N.Nazarbaevtyń bastamasymen Qazaq handyǵynyń 550 jyldyǵyna orai qazaq bileri men handary atynan tuńǵysh ret bádel qajylyq uiymdastyrylǵan bolatyn.
Osy oraida elimizdiń tarihynda airyqsha orny bar, arǵy tegi Aq Ordanyń negizin qalaǵan Orda Ejen hannan bastaý alatyn Qazaq Ordasynyń tarihyndaǵy eń uly handardyń biri — Abylai han atynan bádel qajylyq jasaý Túrkistan oblysy bas imamynyń orynbasary Muhamedjan Estemirovke júktelgen. Uly hannyń musylmandyq paryzyn óteý jolynda uly amanatty moinyna alǵan Muhamedjan Jamantaiuly tulǵaǵa tiesili qajylyq kiim Abylai han muralarymen birge bolǵanyn jón sanapty.
«Áziret Sultan» memlekettik tarihi-mádeni qoryq-mýzeii direktorynyń mindetin atqarýshy Ersin Tájibaev mýzei qoryna tapsyrylǵan qundy murany zor qýanyshpen qabyl alǵanyn jetkize otyryp Muhamedjan Jamantaiulyna alǵys bildirdi.
Bádel degenimiz – buryn qajylyqqa baryp kelgen adamnyń ózge adamnyń atynan jasalatyn qajylyǵy. Mal dúniesi bola tura densaýlyǵy, qarttyǵy sebepti nemese ótken babalarynyń atynan barýǵa ruqsat etilgen.
Shariǵat boiynsha Bádál qajylyqty dini bilimi bar adamnyń nemese imamdardyń atqarǵany abzal delinedi.
Ihram kiimi — qajylyqtyń bir paryzy bolyp sanalady. Ihram eki bólikten turatyn mata. Iaǵni ústingi jaǵy «RIDA», al tómengi matany «IZAR» dep atalady.
Aita ketsek, Túrkistan — Abylai hannyń bilik qurǵan, aq kiizge kóterilip han sailanǵan, máńgilik tynys tapqan mekeni. Abylai hannyń qabiri Qoja Ahmet Iasaýidiń sol jaq tusynda jatyr. Sondai-aq, Qoja Ahmet Iasaýi kesenesinde Abylai hannyń báibishesi Qarashash, uly Qasym sultan, nemeresi Bopai Qasymqyzy jerlengen.
