Astana ákimdigi Abý-Dabi Plazanyń qurylysyna sapasyz materialdar qoldanylǵan degen aqparatty joqqa shyǵardy, dep habarlaidy elordanyń resmi saity.
Áleýmettik jeli paidalanýshylary Abý-Dabi Plaza keshenin salý barysynda sapasyz material qoldanylady dep atalatyn belgisiz adam túsirgen videomen belsendi túrde bólisip jatyr.
"Joǵaryda aitylǵan video, mamandardyń aitýynsha, boljammen Ońtústik-Shyǵys Aziia elderiniń birinde túsirilgen. Video rolikte kórsetilgen qurylys baǵandarynda aǵash tósenishter paidalanylǵan, bálkim bambýktan salynǵan shyǵar. Budan bólek, videoda qurylys jumystary jaz mezgilinde júrgizilgeni anyq kórinip tur", — dep jazylǵan habarlamada.
Elorda ákimdigi túsindirgendei, Abý-Dabi Plaza kesheni qurylysynda joǵaryda kórsetilgen materialdar qoldanylmaidy. Qurylys jumystarynyń sapasyn tehnikalyq jáne avtorlyq taraptar turaqty túrde baqylap otyr. Sondai-aq, injenerlik-tehnikalyq qyzmetkerlerdiń qaýipsizdigi qatań saqtalady.
Astana ákimdigi áleýmettik jeli qoldanýshylaryn eskertkendei, 2015 jyldyń 1 qańtarynan bastap jańa Qylmystyq kodeks kúshine engen, soǵan sáikes jalǵan aqparat berý, taratý jáne paidalaný qylmystyq jaýapkershilikke ákep soǵady.
