Birikken Arab Ámirlikteriniń astanasynda Izrail elshiligi ashyldy. Bul - ótken jyly elder arasyndaǵy qarym-qatynasty tolyq qalpyna keltirý týraly kelisimniń nátijesi, dep habarlaidy "Ult aqparat".
24 qańtarda Abý-Dabide Izrail elshiligi BAÁ-ge diplomatiialyq missiianyń basshysy Eitan Naeniń kelýimen qatar ashyldy, dep habarlady Izrail Syrtqy ister ministrligi.
Málimdemede atap kórsetilgendei, «Izraildiń Birikken Arab Ámirlikterindegi elshiligi elder arasyndaǵy bailanystyń damýyna yqpal etedi».
Eitan Nae – Izraildiń Túrkiiadaǵy burynǵy elshisi, BAÁ-de ol ýaqytsha senimdi ýákil mártebesine ie bolady.
Sondai-aq 24 qańtarda Ámirlikterdiń biligi Tel-Avivte elshilik ashýǵa ruqsat bergen bolatyn.
Bir apta buryn Izrail premer-ministri Biniamin Nataniahýdyń aqpan aiynda Birikken Arab Ámirlikterine baratyny belgili boldy.
Izrail úkimeti basshysynyń sapary elder arasyndaǵy qatynastardy qalypqa keltirý týraly kelisimderge qol qoiylǵannan keiingi alǵashqy sapar bolmaq.
