Ánshi Qaraqat Ábildina úiinde qazaq estradasyna tanymal ABK tobynyń músheleri bas qosyp, ótken kúnderdi eske alǵanyn aityp, paraqshasynda jazba jariialady, dep habarlaidy ult.kz.
«Búgin bizdiń úige ABK-nyń serileri at basyn tiredi… Bul azamattardy tanyǵanyma biyl týra 30 jyl eken. ABK tobynyń qurylǵanyna da — 30 jyl», – dep jazdy Qaraqat Ábildina.
Qaraqattyń aitýynsha, ABK tobynyń ánderi onyń stýdenttik shaǵymen tyǵyz bailanysty.
«ABK-nyń ánderimen stýdenttik shaǵym ótti. Olardy kórgen saiyn kóz aldyma bal-bul jainaǵan 18 jasym keledi… Arman kóp, ýaiym az, kóńil alańsyz kez. Qandai shaqtar edi…» – dep eske aldy ol.
Dastarqan basynda otyrǵan jandar 30 jyl burynǵy kúnderdi bir-birlep eske alyp, birge júrgen dostaryn sóz etken. Birde kúlip, birde kúrsinip, ómirden ótken jaqyndaryn da eske aldy.
Solardyń biri – Medeý Arynbaevtyń jary Aigúl. Qaraqat Ábildina marqummen týǵan abysyndardai jaqyn aralasqanyn aityp, onyń jarqyn beinesin eske aldy.
«Aigúlmen týǵan abysyndardai jaqyn aralastyq. Jany sondai jaqsy adam edi… Ókinishke qarai, ǵumyry qysqa boldy. Imany joldas, jany jánnatta bolsyn! Kórmegen jaqsylyǵyn artynda qalǵan ul men qyzyna kórý buiyrsyn!» – dep jazdy ánshi.
Basqosý barysynda Erlan Kókeev pen Anardyń otbasy týraly da sóz bolǵan. Qaraqat olardyń búginde eki ret quda-qudaǵi atanǵanyn aityp, qyzyq jaitty bólisti. Eki otbasynyń qyzdary bir áýletke kelin bolyp, abysyn atanǵan. Buǵan ánshi tańdanysyn jasyra almai:
«Ómir degen qandai qyzyq?!..» – dedi ol.
Ánshi ýaqyttyń qalai zymyrap ótkenin óz otbasyndaǵy estelikpen de bailanystyrdy.
«Keshe ǵana bizdiń úilený toiymyzda meniń toi kóilegimniń etegin ustap júrgen 4-5 jastaǵy Aikamyz bir áýlettiń úlken kelini atanyp otyr. Qyzdarymyzdyń barǵan jerinde baǵy janyp, baqyttary baiandy bolsyn!» – dep tilek bildirdi Qaraqat Ábildina.
Ánshi úshin bul kezdesý 30 jyldyq tarihty qaita paraqtaǵandai áser qaldyrǵan.
«30 jyl… Osy bir sannyń ishinde qanshama ómir jatyr deseńizshi. Jastyq shaq, dostyq…» – dep jazdy ol.
