Sh.Aimanov atyndaǵy «Qazaqfilm» kinostýdiiasynda Ábish Kekilbaevtyń «Shyńyraý» povesi boiynsha tolyqmetrli kórkem filmniń túsirilimderi bastaldy, dep habarlaidy "Ult aqparat" baspasóz qyzmetine silteme jasap.
Film Mádeniet jáne sport ministrliginiń tapsyrysy boiynsha túsirilýde. Filmniń stsenarii avtory jáne rejisseri Jańabek Jetirýov.
Túsirilimniń barlyǵy derlik Mańǵystaý oblysynda ótedi. Filmde Qaraqiia oiysy, Ústirt shoqysy jáne Kaspii teńizi kórinis tabady. Túsirilimder úshin Fort-Shevchenko qalasyna jaqyn jerdegi Qanǵa aýylynda dekoratsiialar turǵyzylyp, eldi-meken faktýralandy.
Basty rólderge Asylhan Tólepov pen Aldabek Shalbaev bekitilgen. Sondai-aq filmge Muhamedjan Myrzakiev, Dáýlet Ábish, Qanatbek Qurymbaev, Maqsat Sábitov, Azamat Sharǵyn, Zýhra Saipi jáne basqalar túsetin bolady.
Sh.Aimanov atyndaǵy «Qazaqfilm» AQ Eksperttik keńesi otyrysynda rejisser bylai dedi: «Kóptegen otandyq kinematografister uly Ábish Kekilbaevtyń povesi boiynsha film qoiýdy jáne ekrandaýdy armandady. Alaida áli kúnge deiin poves ekran tilinde sóilegen emes. Men bul taqyrypta film túsirem dep júrgeli kóp boldy. Stsenariidi tórt jyl buryn jazyp, túzetýlerdi kúni búginde deiin engizip otyrdym. Qazir meniń bar qalaýym – Ábish Kekilbaevtyń povesi deńgeiindegi film túsirý. Biz lokatsiia men natýra tańdaý boiynsha kóp jumys atqardyq. Barlyq akterlerdi bekittik. Bir-eki kúnde Mańǵystaý oblysyna túsirilimderdi bastaýǵa jolǵa shyǵamyz».
Jańabek Jetirýov kóptegen derekti filmderdiń jáne «Dúniejaryq», «Aqqyz» atty kórkem sýretti filmderdiń avtory. Sondai-aq, Jańabek Jetirýov jazýshy Ábish Kekilbaevtyń ómiri men shyǵarmashylyǵyna arnalǵan «Samǵaý» derekti film túsirgen. Film QR Mádeniet jáne sport ministrliginiń tapsyrysy boiynsha Sh.Aimanov atyndaǵy «Qazaqfilm» AQ jasalǵan.
Filmniń qysqasha mazmundamasy: Film jiyrmasynshy ǵasyrdyń basyndaǵy qazaq qoǵamynda qalyptasqan áleýmettik problemalardy qozǵaidy. Jartylai otyryqshy jáne kóshpeli turmys keshetin qazaqtardyń arasyn jalǵastyryp júrgen basty keiipker Eńsep shyńyraýdan qudyq qazyp, Ústirtte aty shyǵady. Eńsep bai, aýqatty adamdardyń qudyǵyn qazyp, kedei kepshikterdiń tapsyrystaryna at ústi qaraidy. Osy tákapparlyǵy ózine kesir bolyp, ol aqyry jumyssyz qalady. Aýylǵa Buhara jaqtan kóship kelgen qalpaq degen bireý, Eńseptiń ornyn basyp, Ústirtte eń tereń qudyq qazady. Bul Eńseptiń qyzǵanyshyn oiatady. Ol odan da tereń qudyq qazam dep, aqyry báseke túbine jetedi.
