QR Ulttyq kitaphanasynda Halyq jazýshysy, kórnekti memleket jáne qoǵam qairatkeri, Parlament Májilisiniń tóraǵasy bolǵan Ábish Kekilbaevtyń 80 jyldyǵyna orai bibliografiialyq kórsetkish pen entsiklopediianyń tusaýy kesildi, dep habarlaidy "Ult aqparat".
Jiyn barysynda filologiia ǵylymdarynyń doktory, professor «Arys» baspasynyń direktory, entsiklopediia avtory Ǵarifolla Ánes óz pikirin bildirdi.
«Aldymen búgin tusaýy kesilip jatqan bibliografiia jaily aitýymyz kerek. Bul Ulttyq kitaphana bibliografiiasynda daiyndaldy. Eń alǵash entsiklopediia úsh tom bolyp jaryq kórdi. Halyqtyń suranysynyń kóptigine bailanysty kitap tez tarap ketti. Birinshi tomy Ábish Kekilbaevtyń shyǵarmashylyǵyna arnaldy. Bul tomǵa 13 áńgimesi, 10 povesi, 3 romany, «Abylaihan pesasy», 660 maqalasy kirgen bolatyn. Ekinshi tomy jazýshynyń ómiri men ortasyna arnalǵan. Bul tomda Ábish aǵanyń dúniege kelgennen o dúniege attanǵanǵa deiingi barlyq ómirindegi kún-kúnimen, ai – aiymen barlyq shyǵarǵan eńbekteri, aitylǵan pikirler, saparlar barlyǵy jazylady. Bizdiń paiymdaýymyzsha, bul ekinshi tom Qazaqstannyń 1950 – 1960 jyldyq mádeni ómirin qamtidy. Entsiklopediianyń aty Ábish Kekilbaev bolǵanymen, entsiklopediia 1950 – 1960 jyldardaǵy sovet zamanyn sýretteidi. Mýzyka ónerinde Shámshi Qaldaiaqovtyń mýzyka ónerine úles qosýy, Qyz Jibek filminiń túsirilýi, qajet bolsa Nursultan Ábishuly siiaqty saiasatkerdiń shyǵýy - bul 1960 jyldaǵy oqiǵalar. Ábish Kekilbaev osy 1960 jyldyń basy-qasynda boldy. Tek qana jazýshy emes, qazaq rýhaniiatyn da jylt etken jańalyqtyń bárine óziniń syni kózqarasyn aityp otyrǵan. Entsiklopediianyń 3-tomynda qalamgerdiń naqyl sózderi toptastyrylǵan», - dedi Ǵarifolla Ánes.
Mamandardyń aitýynsha, bolashaqta kitap tek qazaq emes, basqa tilderde de jaryq kóredi.
Ábish Kekilbaevtyń ómirden ozǵanyna eki jyl bolsa da Qazaqstannyń túkpir túkpirinde jazýshynyń 80 jyldyǵyna bailanysty «Ábish Kekilbaev álemi» aiasynda túrli sharalar atalyp ótip jatyr.
Aitýly dataǵa bailanysty Almaty qalasynda Ábish Kekilbaevqa arnap kóshe aty berildi. Óziniń týǵan jeri Mańǵystaý oblysynda mýzei ashylyp, eskertkish qoiyldy.
