Syrttai 20 jylǵa sottalǵan BTA bankiniń burynǵy basshysy Muhtar Ábiliazovtiń sybailastary óz erikterimen Qazaqstanǵa oraldy. Bul týraly búgin QR Sybailas jemqorlyqqa qarsy is-qimyl agenttigi Asa mańyzdy qylmystyq isterdi tergeý departamentiniń basshysy Sergei Perov aitty, dep habarlaidy QazAqparat.
«2017 jyldyń 7 maýsymynda Almaty qalasynyń qylmystyq ister jónindegi mamandandyrylǵan aýdanaralyq soty uiymdasqan qylmystyq topqa basshylyq jasap, BTA bankiniń 7,5 mlrd dollar qarajatyn urlaǵany úshin basty figýrant Muhtar Ábiliazovti 20 jylǵa bas bostandyǵynan aiyrdy. Qabyldanǵan sharalardyń arqasynda BTA bankinen shamamen 2 mlrd dollar qaitaryldy» dedi ol.
Onyń atap ótýinshe, atalǵan qylmystyq is boiynsha 42 adam sottalǵan. Sońǵy ýaqytta izdeýde bolǵan 10 adam óz erikterimen Qazaqstanǵa kelgen. Olardyń qatarynda Jaqsylyq Járimbetov, Sádýaqas Mámesh, Qairat Sadyqov syndy BTA-nyń top-menedjerleri bar.
«Olardyń barlyǵyn sot kináli dep tanydy. Degenmen, kinálaryn tolyq moiyndap, tergeý amaldaryna kómek kórsetkenderi úshin olarǵa shartty túrde jaza taǵaiyndaldy. Biylǵy jylǵy mamyrda Qazaqstanǵa óz erikterimen oralǵan 7 tulǵaǵa qatysty tergeý amaldary aiaqtaldy. Olardyń qatarynda Ábiliazov baqylaýynda bolǵan «IPG Evraziia», «Evraziia Siti» jáne «Slavinvsetbank» kompaniialary Direktorlar keńesiniń burynǵy tóraǵasy Artýr Trofimov bar» dedi Sergei Perov.
