Abai sózderi memlekettik deńgeide qoldaý tapqanda intellektýaldy ultqa ainalamyz.
Mundai pikirdi Q.Jubanov atyndaǵy Aqtóbe óńirlik memlekettik ýniversiteti Abaitaný jáne ulttyq rýhaniiat ortalyǵynyń jetekshisi Abat Pangereev bildirdi, dep habarlaidy QazAqparat.
«Memleket basshysy óz maqalasynda intellektýaldy ult qalyptastyrýdyń jolynyń bastaýynda Abai tur dep dóp basyp aitqan. Sebebi bizdiń ultymyzdyń rýhani tólqujaty – Abai. Bóten jurt, basqa halyqtar Abaidyń sózi arqyly ulttyq óremizdi, dúnietanymyzdy, ómirge kózqarasymyzdy tanyp, sol arqyly baǵalaidy. Abai – qazaqtan shyqqan fenomen. Abai sózi ólmeidi. Sebebi onyń sózinde ulttyq sanaǵa sińetin, ulttyq qan tamyrlarynyń búlkiline sep bolatyn rýh bar. Qai zaman bolsa da Abai sózi ólmeidi. Abai: «Kúshik asyrap, it ettim, Ol baltyrymdy qanatty. Bireýge myltyq úirettim, Ol mergen boldy, meni atty», deidi. Qazir de sondai jaǵdai bar. Adam pende bolǵannan keiin mundai astamshylyq bolady. Mine, Abai baiaǵyda aitqan jait qazirde qaitalanyp keledi», - dedi filologiia ǵylymdarynyń doktory, professor.
Onyń aitýynsha, Abai aityp ketken dúnieler ómirdiń kodeksi, adamgershiliktiń ustanymy, imandylyqtyń naǵyz kórinisi ispetti.
«Biz Abai sózin kóp aita almaimyz júrmiz. Aqyn sózderi memlekettik deńgeide qoldaý tapqanda biz tárbieli ult bolamyz. Jastardy tárbieleý kerek deimiz. Jalpy úlkenderden bastap tárbieleý kerek. Sol úlkenderge qarap jastar boi túzeidi. Intellektýaldy ult degenimiz tek jastar emes, búkil halyq. Sondyqtan Abaidyń «tolyq adam» ilimin barlyq jerde nasihattai bilýge tiispiz. Abaidyń qara sózderin, óleńderin tereń uǵynyp, sol arqyly halqymyzdy tárbielesek intellektýaldy ultqa ainalamyz», - dedi Abat Pangereev.
