Abaidyń 3 tomdyq akademiialyq tanymdyq jinaǵy jaryqqa shyǵady. Bul týraly Qazaqstan Jazýshylar odaǵynyń tóraǵasy Ulyqbek Esdáýlet aitty, dep habarlaidy QazAqparat.
«Adamzattyń alǵashqy ustazy Aristotelden bergi búkil ustazdardyń, klassikterdiń qai-qaisymen de Abaidy terezesi teń turatyn danyshpan dep esepteimiz. Qazaqstannyń Jazýshylar odaǵy Abaidyń 175 jyldyq mereitoiyna orai aqynnyń poeziialyq kúntizbesin shyǵardy. Sonymen qatar interaktivti kitabyn daiyndadyq. Ol qazir óndiriste. Interaktivti kitapta Abaidyń óleńderi, qara sózderi, ánderi, kúileri barlyǵy dybystalyp oryndalady. Ony Qazaq radiosynyń úzdik diktorlary, qazaqtyń arǵy-bergi ǵajaiyp áshileri oryndaidy. Tehnologiianyń ozyq zamanynda mundai kitap taptyrmaityn dúnie sanalady. Ony fleshka, diski túrinde tarata berýge bolady», - dedi Ulyqbek Esdáýlet.
Sonymen qatar ol búkil qarjynyń koronavirýspen kúreske jumsalýyna bailanysty Almaty qalasynyń is-sharalar josparyna kirgenimen iske aspai turǵan bir shara bar ekendigin aitty.
«Ol Jazýshylar odaǵynyń aldyna Abaidyń keýde músinin ornatý bolatyn. Odan basqa Abaidyń shyǵarmalary 10 tilge aýdarylyp, qazir jaryqqa shyǵyp jatyr. Munan bólek M.Áýezov atyndaǵy Ádebiet jáne óner institýty daiyndaǵan Abaidyń 3 tomdyq akademiialyq tanymdyq jinaǵy jaryqqa shyǵady. Oǵan elimizdiń Prezidentiniń ózi bas-kóz bolyp, baqylaýyna alyp otyr», - dedi Jazýshylar odaǵynyń tóraǵasy.
Aita keteiik, qazaqtyń uly aqyny Abaidyń 175 jyldyq mereitoiyna orai QR Memlekettik hatshysy Qyrymbek Kósherbaev bastaǵan bir top memleket jáne qoǵam qairatkeri elordadaǵy Abai eskertkishine saltanatty jaǵdaida gúl shoqtaryn qoiǵan edi.
Esterińizde bolsa taiaýda Qazaqstan Úkimetiniń qaýlysymen 10 tamyz Abai kúni bolyp belgilendi.
