Erteń elordanyń Astana-kontsert zalynda «Adamzattyń alyby – Hakim Abai» respýblikalyq aitysy uiymdastyrylady, dep habarlaidy QazAqparat.
«Erteńgi aitys – Abai babamyzdyń 175 jyldyǵyna orai ótetin sharalardyń biri. Aitys saǵat 14.00-de bastalady. 16 aqyn qatysady. Aitys Mádeniet jáne sport ministrliginiń uiymdastyrýymen, «Nur Otan» partiiasynyń qoldaýymen ótkizilip jatyr. Jalpy, ministrlik pen partiia óńirlerde osyndai aitystardy ótkizýdi josparlaýda. Bul- biylǵy jyldyń basty aitysy bolady», - dedi Mádeniet jáne sport vitse-ministri Nurǵisa Dáýeshov OKQ-da ótken baspasóz máslihatynda.
Al Qazaqstannyń Eńbek sińirgen qairatkeri Júrsin Ermannyń aitýynsha, aitys aldynda aqyndardyń reitingi jasalǵan.
«Jalpy, keiingi jyldary tabiǵi qalpynan shyǵaryp aldyq pa degen qaýip bar. Sonaý kúni Oralda «Altyn dombyranyń» aldyndaǵy timbildingte 60-70 aqyn bas qosyp aqyldasyp, aitystardyń shynaiylyǵyna qol jetkizý sharasyn qoldanaiyq dep sheshtik. Erteńgi aitys qalai ótedi eken dep, ózimiz de qobaljyp otyrmyz. Óitkeni, aitystyń sýyryp salma qasietine burylaiyq dep otyrmyz. Jasyratyny joq, aqyndardy buryn juptap qoiatynbyz. Daiyndalyp keletin de, qansha aqyn baiqatpaimyn degenimen, kishkene jattandylyq bar ekenin sizder de, biz de jaqsy bildik. Soǵan jol bermeý úshin halyqtyń aldynda birinshi ret juptaiyq dep otyrmyz. Iaǵni, kimmen kimniń aitysatynyn eshkim bilmeidi», - dedi ol.
Júrsin Erman jáshik qoiyp, sonyń ishindegi shardyń ishinde salynǵan 16 aqynnyń esimimen juptar belgilenetinin jetkizdi. Zaldan kez kelgen kórermen shyǵyp, shardy sýyryp, juptardy belgileidi. Jalpy aitystyń júlde qory – 10 million 400 myń teńge.
«Jattandy aitysqa jol bermeimiz. Úsh-tórt shýmaqpen qaiymdasyp, jaýaptasyp aitysady. Jeti tóreshi (qazylar alqasynyń tóraǵasy – Nesipbek Aituly) burynǵysha upai arqyly daýys bermeidi. Ár qazynyń aldynda eki batyrma turady. Qai aqynǵa kóbirek kók sham janady, sol sózsiz aitystyń kelesi ainalymyna ótedi. Sondyqtan, aqyndardyń shynaiy qabiletin kórsetsek deimiz», - dedi Júrsin Erman.
Aitysta Rústem Qaiyrtaiuly, Muhtar Niiazov, Erkebulan Qainazarov, Ásem Erejeqyzy, Meiirbek Sultanhan qatarly belgili aqyndar ózara baq synasady.
