L. N. Gýmilev atyndaǵy Eýraziia ulttyq ýniversitetinde el Prezidenti Qasym-Jomart Toqaevtyń «Abai jáne HHI ǵasyrdaǵy Qazaqstan» atty maqalasyn talqylandy, dep habarlaidy QazAqparat tilshisi.
Ýniversitet rektory Erlan Sydyqov osy maqala arqyly uly aqynnyń 175 jyldyq mereitoiyna jan-jaqty daiyndyq bastalǵanyn atap ótti.
«Maqala qarapaiym tilmen jazylsa da, onda tereń oilar men baǵyttar usynylǵan. Ókinishke qarai, biz osy kúnge deiin Abaiǵa tereń boilai almai kelemiz. Ásirese, sovet zamanynda Abaidy halyqqa jaqyndatqan joq. Onyń poeziiasyn ǵana usyndy. Onyń ózinde de din, musylmandyq, bilik, bailyq týraly aitqan óleńderi men sózderin jetkizbedi. Ainalyp kelgende, Abaidyń ǵylymi biografiiasyn jazýǵa da múmkindik berilmedi. Onyń barlyǵy Muhtar Áýezovtyń «Abai joly» epopeiasynyń alǵashqy nusqalarynyń ózin shyǵarmai, ideiany taptyq-partiialyq printsip tóńiregine ákelmeiinshe qabyldaǵan joq. Biz Abaidy sol roman tóńireginde ǵana bilip júrdik», - dedi Erlan Sydyqov EUÝ-da ótken jinalysta.
Onyń aitýynsha, jańa zamandaǵy, táýelsiz Qazaqstandaǵy jańa urpaq tolassyz aqparat dáýirinde ómir súrip jatyr.
«Qazir jan-jaqtan kelip túsken aqparat legin eshkim toqtata almaidy. Júregimizge de, sanamyzǵa da, miymyzǵa da kelip jatyr. Osy turǵyda ásirese jastar qandai baǵyt ustaýy kerek? El bolyp qalamyz ba? Eldik qasietterimizdi saqtai alamyz ba? Ult bolyp uiimyz ba? Tilimizdi, dilimizdi saqtai alamyz ba? Álde syrttan kelgen dúdámal qundylyqtarǵa erip ketemiz be? Túptep kelgende qazaq bolyp qalamyz ba, joq pa? Mine, keshe shyqqan maqalanyń negizgi oi-baǵyty, kontseptýaldy tujyrymy «Bizge baǵyt berýshi kim?» degenge jaýap berip otyr. Ol – uly Abai. Abaiǵa qaitadan keleiik, jańasha keleiik, Abaidyń qyzmeti men ómirine kóńil bóleiik. Sol arqyly ózimizdiń jolymyzdy anyqtaiyq. Osylaisha, uly Abaidyń bizgen shyraq ekenin, jol kórsetýshi baǵyt berýshi ekendigin osy maqala meńzep otyr. Olai bolsa, Abaiǵa biz kerek emes shyǵarmyz, bizge Abai kerek. Óziniń kezekti mereitoiymen Abai bizge taǵy bir múmkindik berip otyr. Osy maqala arqyly Abaiǵa taǵy zer salyp, boitumar etip ustap, ómirlik standartymyzǵa ainaldyraiyq», - dedi rektor.
