Ózbekstan Olii Majlisi Zań shyǵarý palatasynyń spikeri Nýrdinjon Ismoilov Qazaqstan Parlamenti Májilisiniń tóraǵasy Nurlan Nyǵmatýlinnen qazaqtyń uly aqyny Abaidyń 175 jyldyǵyna arnalǵan chellendjdi qabyldady, dep habarlaidy "Ult aqparat".
«Abai aqyn ári uly oishyl bola otyryp, halyqtar arasynda beibitshilik saltanat qurǵanda ǵana qoǵamnyń negizgi kúshteri: ǵylym, ozyq oilar, mádeniet damidy dep sanady», - deidi Olii Majlis palatasynyń spikeri.
Nýrdinjon Ismoilov osy aktsiianyń Ózbekstandaǵy Qazaqstan jyly toilanyp jatqan ýaqytqa tuspa-tus kelgenin atap ótti. Spikerdiń aitýynsha, bul – qazaq pen ózbektiń máńgi ári shynaiy dostyǵynyń, mádeni ári rýhani birliginiń simvoly.
«Týysqan eki halyqtyń taǵdyry da, bolashaǵy da ortaq», - dedi ózbek spikeri.
Ol Ózbekstanda jyl saiyn 10 tamyz kúni uly aqynnyń týǵan kúnine orai saltanatty sharalar uiymdastyrylatynyn, Tashkent memlekettik pedagogika ýniversitetinde «Abai jáne ózbek ádebieti» ekspozitsiiasy ashylǵanyn, oqýshylar men stýdentter arasynda Abai taqyrybyna shyǵarmalar baiqaýy ótetinin jetkizdi.
Abaidyń óleńin ózbekshe oqyǵan Nýrdinjon Ismoilov estafetany Qazaqstan Respýblikasynyń Ózbekstan Respýblikasyndaǵy Tótenshe jáne Ókiletti Elshisi Darhan Satybaldyǵa joldady.
