Memleket basshysy «Egemen Qazaqstan» búgin jaryq kórgen «Abai jáne XXI ǵasyrdaǵy Qazaqstan» atty maqalasynda naǵyz ult aqyndaryn ózge tilderge aýdarý – ońai sharýa emes ekendigine nazar aýdardy.
«M.Áýezovtiń «Abai joly» romany arqyly Abai beinesi kórkem obraz retinde álem ádebietinde joǵary baǵalanǵany belgili. Biraq bul – Abaidy tanýdyń bir qyry ǵana. Naǵyz Abaidy, aqyn Abaidy taný úshin onyń óleńderi men qara sózderinde aitylǵan oi-tujyrymdardyń mán-mańyzy ashylýy kerek. Ol álemniń keń taralǵan negizgi tilderine barlyq boiaýyn saqtai otyryp aýdarylýy tiis. Buǵan biz tolyq qol jetkize aldyq dep aitý qiyn. Naǵyz ult aqyndaryn ózge tilderge aýdarý – ońai sharýa emes. Aýdarmashy da sol oishyldyń deńgeiindegi talant bolýy kerek. Bizdiń abaitanýshy ǵalymdarymyz, til mamandary men janashyr azamattar osy máselege erekshe mán bergeni jón» ekeni jazylǵan maqalada.
Maqalada málim bolǵandai, uly aqynnyń shyǵarmalary on tilge aǵylshyn, arab, japon, ispan, italian, qytai, nemis, orys, túrik, frantsýz tilderine tárjimalanady.
Memleket basshysy aqyn shyǵarmalary tek qazaqtyń ǵana emes, búkil adamzat balasynyń rýhani ómirin jan-jaqty baiyta alatynyna senimdi.
«Elbasy Nursultan Ábishuly Nazarbaev: «Abai – qazaq halqynyń rýhani qazynasyna ólsheýsiz úles qosqan ǵulama ǵana emes, sonymen qatar ol qazaq halqynyń el bolýy jolynda ulan-ǵaiyr eńbek etken danager. Abai – álemdik deńgeidegi oishyldardyń qataryndaǵy ǵajaiyp tulǵa», degen bolatyn. Shynynda da, dana aqyn shyǵarmalary tek qazaqtyń ǵana emes, búkil adamzat balasynyń rýhani ómirin jan-jaqty baiyta alady. Óitkeni Abai týyndylarynyń mazmuny jalpyadamzattyq qundylyqtarǵa toly. Onyń qara sózderi – álem halyqtarynyń ortaq qazynasy. Bul – klassikalyq úlgidegi ónegeli oilar shoǵyry. Naqyl sóz, ǵibratty sóz, ǵaqliia sózder dep árqily atalǵanymen, bul – erekshe janr» dep jazdy Qasym-Jomart Toqaev.
