Búgin «Abai» shahtasynda qaza tapqan 5 kenshi jerlendi. Erteń taǵy bir shahtiormen qoshtasý rásimi ótedi, dep habarlaidy QazAqparat.
Búgin Abai qalasynda shahtada metannyń taralýynan qaza tapqan kenshilermen qoshtasý rásimi ótti. Onyń ishindegi eń jasy - 31 jasta, eń úlkeni - 53-te edi.
«Bul - bárimiz úshin orny tolmas qaiǵy. Biz búgin baýyrlarymyz ben uldarymyzdy jerlep jatyrmyz. Men 71 jastamyn, biraq ókinishke qarai, jas jigittermen qoshtasýǵa kelip turmyn. Bizdiń jumysymyz óte qaýipti. Mundai qaiǵyly jaǵdaidyń aldyn alý múmkin emes. Shahtada jumys isteitinderdiń bári bizdiń jumysymyz asa qaýipti ekenin biledi», - deidi ardager shahtior Viktor Kazakov.
«ArselorMittal Temirtaý» bas direktory qaza tapqandar men zardap shekkenderdiń otbasylary kompaniiadan tolyq moraldyq jáne materialdyq qoldaý alatynyna sendirdi.
«Biz otbasylarǵa kómek kórsetý úshin ár úielmenge jaýapty tulǵalardy taǵaiyndadyq. Biz sondai-aq zardap shekkenderge qamqorlyq jasaimyz. Olarǵa meditsinalyq jáne basqa da kómek kórsetemiz. Komissiia jumys isteidi. Biz bolǵan oqiǵany tergeý barysynda komissiiaǵa jan-jaqty qoldaý kórsetemiz. Memlekettik komissiianyń tergeýi aiaqtalǵanǵa deiin bizge ishki tergeý júrgizýge ruqsat joq», - dedi «ArselorMittal Temirtaý» AQ Bas direktory Bidjý Nair.
Sondai-aq kompaniia basshylyǵy qaza tapqandardyń balalary men otbasylaryna oqý aqysyn tóleý jáne nesielerin óteý boiynsha kómek kórsetýge mindettenedi.
«Oqýǵa qatysty bizde 20 jasqa deiin ýniversitette oqýǵa qarajat berý týraly mindetteme bar. Másele qazir talqylanyp jatyr. Ár otbasyna jerleý, qonaq asyn uiymdastyrý siiaqty barlyq mindettermen ainalysatyn maman taǵaiyndalady. Kompaniia olardyń nesiesin óteýdi óz moinyna alady. Kompaniia qaza tapqandardyń otbasyna on jyldyq jalaqy tóleý boiynsha mindetteme aldy», - dedi «ArselorMittal Temirtaý» AQ atqarýshy direktory Álisher Ábenov.
Eske salaiyq, 7 qarasha kúni saǵat 08:24-te «ArselorMittal Temirtaý» AQ Kómir departamentiniń «Abai» shahtasynda metan gazy tarai bastaǵan. Bul ýaqytta shahtada 64 adam jumys istep jatqan, 54-i evakýatsiialandy.
Apat saldarynan eki adam zardap shegip, alty kenshi qaza tapty. Zardap shekkender aýyr halde jansaqtaý bóliminde jatyr.
Prezident Qasym-Jomart Toqaev qaza tapqan shahterlerdiń jaqyndary men týystaryna kóńil aitty. Sondai-aq zardap shekken azamattardyń tezirek saýyǵyp ketýine tilektestik bildirdi.
Apat saldarynan qaza bolǵandar men zardap shekkenderdiń esimi jariialandy.
QR TJM basshysy Iýrii Ilin BAQ ókilderine arnalǵan brifingide apatqa qatysty qylmystyq is qozǵalǵanyn aitty.
Kóz jumǵan 6 kenshi metan gazy taraǵan kezde qutqarý quralyn kiip úlgermei qalǵan.
