Foto: caravan.kz
Abai oblysy Úrjar aýdanynyń Besterek aýylynda aýyr jol apaty tirkeldi. Úidiń mańynda oinap júrgen balalardy 55 jastaǵy «Toyota» avtokóliginiń júrgizýshisi qaǵyp ketken, dep habarlaidy Ult.kz.
Saldarynan eki bala oqiǵa ornynda kóz jumsa, bireýi aýrýhanaǵa bara jatqan jolda qaitys boldy. Taǵy úsh bala túrli jaraqat alyp, dárigerlerdiń baqylaýynda jatyr.
Oblystyq politsiia departamentiniń málimetinshe, júrgizýshi rólge ie bola almai qalǵan. Meditsinalyq saraptama onyń masań kúide bolmaǵanyn kórsetti. Qazirgi tańda kúdikti qamaýǵa alyndy.
Prezidenttiń tapsyrmasymen Abai oblysyna Qorǵanys ministrliginiń S-295 ushaǵymen reanimatolog, neirohirýrg jáne travmatolog dárigerlerden quralǵan arnaiy brigada jiberildi. Qazir balalarǵa barlyq qajetti meditsinalyq kómek kórsetilip jatyr.
Oblys ákimi Berik Ýálidiń tapsyrmasymen aýdan ákimi Aqylbek Bashimbaev qara jamylǵan otbasylarǵa baryp, kóńil aitty. Qaitys bolǵan balalardy jerleý rásimi tolyqtai ákimdik tarapynan uiymdastyrylady. Sondai-aq ata-analaryna psihologiialyq jáne materialdyq qoldaý kórsetilmek.
Oblys ákiminiń orynbasary Meiirlan Rahanov pen arnaiy qurylǵan top oqiǵa ornynda jumys júrgizýde. Ákimdik qaza tapqandardyń otbasylaryn erekshe baqylaýǵa alatynyn málimdedi.
