«Nur Otan» partiiasy men «Jas Otan» jastar qanaty uly Abaidyń 175 jyldyq mereitoiy aiasynda elimizdiń barlyq óńirinde 350-den astam is-shara ótkizdi. Bul týraly Semei qalasyna kelgen «Nur Otan» partiiasy Tóraǵasynyń birinshi orynbasary Baýyrjan Baibek aitty, dep habarlaidy "Ult aqparat".
«Barshańyzǵa málim, biyl dana Abaidyń týǵanyna 175 jyl tolyp otyr. Uly oishyldyń mereitoiyn laiyqty atap ótý maqsatynda el Prezidenti Qasym-Jomart Toqaev arnaiy Jarlyq shyǵaryp, ony qoǵamdyq sanany jańǵyrtatyn eldik is-shara retinde ótkizýdi, Alash qairatkerleri tý tikken Semei qalasyn tarihi ortalyq retinde belgileýdi tapsyrdy.
Qashanda eldigin baiandy, memlekettiligin máńgilik etýdi kózdeitin ulttar tarihyna boilap, tuǵyrly tulǵalarynyń asyl oilaryn el damýynyń ózegine ainaldyrady. Elbasy Nursultan Nazarbaevtyń qolǵa alǵan isteriniń túpki túiini de, «Rýhani jańǵyrý» baǵdarlamasy men «Uly Dalanyń jeti qyry» maqalasy da osynaý uly murattardy kózdeidi.
Álemdi sharpyǵan indetke qaramastan, aqyn mereitoiyn atap ótýge bailanysty elimizde birshama aýqymdy jumystar atqaryldy.
Memleket basshysynyń tapsyrmalary aiasynda hakim Abaidyń týǵan jerinde atqarylyp jatqan jumystardy qadaǵalaý maqsatymen búgin Semei qalasyna arnaiy keldim.
Shyǵys Qazaqstan oblysynyń ákimi Danial Ahmetovpen birge shahardaǵy qaita jóndeýden ótkizilgen Abai alańynda, Abai atyndaǵy teatrda bolyp, ary qarai Jidebaiǵa attandym. Uly oishyldyń rýhyna taǵzym etip, aqyn urpaqtarymen, el aǵalarymen kezdestim. El jaiy, rýhaniiat máselesi áńgime arqaýyna ainalyp, belgili qalamger Tólegen Janǵaliev aqsaqal Elbasy, Nursultan Nazarbaevtyń da el Prezidenti retindegi alǵashqy qadamyn Abai elinen bastaǵanyn, osy joldy búginde Memleket basshysy Qasym-Jomart Toqaev ta jalǵastyrǵanyn esine aldy.
Jalpy, Abaidyń 175 jyldyǵyn atap ótý aiasynda úlkendi-kishili 500-ge jýyq is-shara josparlanǵan. Tek Abai aýdanynyń ózinde ǵana mereitoidy uiymdastyrý aiasynda irgeli jobalar iske asyrylǵan. Abaidyń týǵan jeri – Syrt Qasqabulaqta Memorialdyq keshen boi kótergen. Abaidyń ákesi jerlengen Aqshoqy mekeni abattandyrylyp, Qunanbai Óskenbaiuly murajaiy salyndy. Jidebaidaǵy «Abai - Shákárim» keshenine, Abaidyń mýzei-úiine zamanaýi talaptarǵa sai jóndeý jumystary júrgizilgen.
Elimizdiń ózge aimaqtary da Abai mereitoiyna óz úlesterin qosýda. Óz kezeginde «Nur Otan» partiiasy men «Jas Otan» jastar qanaty da osy mereitoi aiasynda elimizdiń barlyq óńirinde 350-den astam is-shara ótkizdi.
Uly Abaidy ulyqtaý, murasyn nasihattaý isi ary qarai jalǵasa beredi.
