Aqyn, abaitanýshy Abai Qalshabek QR Prezidenti Qasym-Jomart Toqaevtyń «Abai - rýhani reformator» atty maqalasyna qatysty pikir bildirdi, dep habarlaidy QazAqparat.
«Abaidyń týǵan kúnin «Abai kúni» dep ataý óte mańyzdy dep esepteimin. Abaidyń shyǵarmashylyǵyna qazaq halqynyń, qazaqstandyqtardyń nazaryn aýdarýǵa septigin tigizetin shara dep oilaimyn. Jalpy, ǵalymdar tulǵataný úsh kezeńnen turatynyn aitady. Birinshi kezeń - miftik kezeń, iaǵni tulǵa týraly ańyzdar tarap, jaqsy-jaman áńgimeler shyǵa bastaidy. Ekinshi kezeń - kórkemdik kezeń. Bul kezeńde tulǵa týraly kórkem shyǵarmalar jazyla bastaidy. Mysaly, «Abai joly» - tulǵatanýdyń kórkemdik kezeńiniń jarqyn úlgisi. Úshinshi kezeń - ǵylymi kezeń. «Jalpy qazaq tarihynda tulǵatanýdyń úsh kezeńinen tolyq ótken bir ǵana adam bar, ol - Abai. Bul - Mekemtas Myrzahmetulynyń pikiri», - deidi Abai Qalshabek.
Onyń aitýynsha, Abaidyń úsh kezeńin júielep bergen adam - Muhtar Áýezov, biraq jalpy halyqtyń Abai týraly tanymy miftik kezeńniń ar jaq-ber jaǵynda júr.
«Keibir adam Abai týraly kórkem shyǵarmalardy oqyǵan bolýy múmkin, al ǵylymi negizde tanyp bildi dep aita almaimyz. Halyq oǵan áli jetken joq. Dál qazir biz Abaidy ǵylymi, teoriialyq turǵyda taný kezeńiniń aldynda turmyz», - deidi abaitanýshy.
Ol 10 tamyz - Abai kúni dep belgilenýi qanshalyqty mańyzdy ekenin aitty.
«Jas urpaq kimdi úlgi tutý kerek degen máselede qatty shatasady. Mysaly, Kenenbai Qojabekov degen qazaqtyń ǵajap akteri bar. Ol «Qyz Jibek» filminde Jibektiń ákesiniń rólin somdaǵan. Ony tanityn jastar qatary saýsaqpen sanarlyq qana. Jastar ony tanymasa da, Gollivýd juldyzy Tom Henksti birden tanýy múmkin. Óz tulǵalarymyzdy tanýǵa kelgende deńgeiimiz óte tómen. Sondyqtan 10 tamyz - Abai kúni retinde belgilenýi óte durys sheshim. Bul «Qazaqtyń tulǵasy kim?» degen suraqtyń jaýabyn tabýǵa qatty úles qosatyn shara. Abaidyń shyn máninde mańyzdy ekenin eske salý - táýelsizdik kezeńindegi ekinshi, úshinshi býyn úshin óte mańyzdy bolady», - deidi ol.
