Oqiǵa Abai qalasyndaǵy «Ádemi» balabaqshasynda bolǵan. Áleýmettik jelini shýlatqan videoda tárbieshi búldirshinderdi jelkesinen nuqyp, basynan uryp jatqanyn kórýge bolady. Balalardyń ata-analary oqiǵany kópshilik nazaryna shyǵarýdy sheshken, dep habarlaidy QazAqparat.
Boljam boiynsha oqiǵa Naýryz meiramyn atap ótý kezinde bolǵan. Sebebi videoda tárbieshiniń ulttyq kostiýmde júrgenin baiqaýǵa bolady.
Balabaqshada ornatylǵan beinekameralardaǵy jazbany qaraý barysynda ata-analardyń biri tárbieshi eki balany basynan sál uryp jibergenin baiqaidy.
Anyqtap qaraǵanda ol óziniń balasyn tanidy.
«Mundai videolardan keiin balalardy balabaqshaǵa jiberýge qorqamyz», - dep jazady abailyqtar áleýmettik jelilerde.
«Pandemiiaǵa bailanysty ata-analarǵa balabaqshalarǵa kirýge tyiym salyndy. Basshylyq tarapynan da baqylaý álsiz, tamaqtanýdy eshkim baqylamaidy. Ata-analar kútpegen jerden jáne 3-5 adamnan kelip, baqylaý júrgizýi kerek. Kishkentai balalar ata-analaryna tárbie, qarym-qatynas jáne tamaqtaný sharttary týraly kóp nárse aita almaidy», - deidi jergilikti turǵyndar.
Abai aýdanynyń bilim bólimi bul oqiǵa qatysty tekseris bastalǵanyn habarlady.
«Ádemi» balabaqshasy jekemenshik jáne Abai aýdanynyń bilim bólimine baǵynyshty emes. Jeke baqsha 2021 jyldyń aqpan aiynda ashyldy, 550 orynǵa eseptelgen. Atalǵan fakti boiynsha komissiia qurylyp, qaraý qorytyndysy boiynsha qajetti sharalar qabyldanady», - deidi bilim bólimi.
Tárbieshiniń áreketin politsiia da tergep jatyr.
«Atalǵan fakt QR QK-niń 140-babynda kózdelgen qylmystyq quqyq buzýshylyq quramynyń belgileri boiynsha Abai aýdanynyń PB-de tirkeldi. Sotqa deiingi tergeý barysynda politsiia qyzmetkerleri 20 jastaǵy kúdiktini anyqtady. Tergeý amaldary júrgizilip jatyr», - dep habarlady Qaraǵandy oblysy PD baspasóz qyzmeti.
