Búgin, 28 qarashada Ulttyq kitaphananyń N. Dáýletova atyndaǵy zalynda «Abai» baspasy shyǵarǵan 35 kitaptyń tusaýkeser rásimi ótti, - dep habarlaidy "Ult aqparat".
Sharaǵa oqyrmandar hám ziialy qaýym ókilderi qatysty. Olardyń qatarynda Temirhan Medetbek, Smaǵul Elýbai, Ulyqbek Esdáýlet, Gúlnár Salyqbai, Baqyt Bedelhan, Jaras Sársek, Erlan Júnis, Beibit Sarybai syndy aqyn-jazýshylar, sondai-aq Syrbai Máýlenov, Muqaǵali Maqataev, Tumanbai Moldaǵaliev, Jarasqan Ábdirashev jáne Tabyldy Dosymov syndy qalamgerlerdiń urpaqtary boldy.
Aita keteiik, «Abai» baspasy usynyp otyrǵan 35 kitap álemdik suranysqa sai, zamanaýi úlgide, minimalizm dizainda jasalǵan. Qazaq ádebietiniń negizin qalaýshy Abai hákimnen bastalyp, ár kezeńniń klassik qalamgerleriniń shyǵarmalarymen jalǵasyn tapqan kitaptardyń ishinde ońailyqpen qolǵa túse bermeitin, izdegenge taptyrmas akademiialyq zertteý eńbekteri de bar. Jinaqtardyń birazy burynnan qalyptasqan forma men túster galereiasyn, tipti mazmuny men taqyrybyn da buzyp-jaryp, jańa tartymdylyǵymen oqyrmanǵa jol tartpaq.
Baspanyń quryltaishysy ári direktory, aqyn Aqberen Elgezek bul kitaptardy basyp shyǵarýǵa memleket qarjysy jumsalmaǵanyn atap ótti.
"Ár kitap myń danamen jaryq kórdi. Aldaǵy ýaqytta kollektsiiany 100 tomǵa jetkizý oiymyzda bar. Bul seriia qazaqtyń bas aqyny hákim Abaidan bastalyp, Dýlat Babataiuly, Shákárim, Máshhúr Júsip Kópeiuly, Muhtar Áýezov, Alashorda qairatkerleri, Keńes Odaǵy zamanynyń áigili qalamgerleri, táýelsiz Qazaqstannyń kórnekti jazýshylary men belgili jas avtorlardyń shyǵarmalaryn qamtidy. Ishinde keibir avtorlar joq. Basqa bir baspalarǵa avtorlyq quqyǵyn berip qoiady. Biz barlyǵyn zań sheńberinde júzege asyrýymyz qajet. Osy oraida «Abai» baspasyna, jeke ózime senim bildirgen bizdiń klasasikterdiń mirasqorlaryna alǵys bildiremin.
Kitaptardy shyǵarýǵa qansha ýaqyt ketti dep surap jatyr. Bul – alty aida jasalǵan jumys. Osy jerde avtorlarǵa, korrektorlarǵa, dizainerler men baspagerlerge, jumyla jumys istegen qyzmetkerlerge alǵys aitamyn. Qarbalas bop jaryq kórse de, júrekke jaqyn dúnie. Bul memlekettik tapsyryspen emes, baspanyń qarjysymen shyǵaryldy. Sol sebepten kitaptardy naryqqa shyǵaramyz, túsken tabystyń belgili bir bóligin avtorlarǵa beremiz. Qazirdiń ózinde kitap naryǵynan usynystar kelip túsip jatyr", – deidi Aqberen Elgezek.
Sondai-aq ol qazirgi orta býyn aqyn-jazýshylary da nazardan tys qalmaǵanyn aitady. Sózinshe, olardyń qatarynda Erlan Júnis, Tanakóz Tolqynqyzy, Ularbek Nurǵalym sekildi belgili avtorlardyń kitaptary qaita basylǵan.
Baspa quryltaishysy sóilep bolǵan soń kezek tusaýkeser rásimine de jetti. Kitaptarǵa bailanǵan qyzyl lentany kórnekti qalamgerler Ulyqbek Esdáýlet, Smaǵul Elýbai jáne Temirhan Medetbek kesti. Osylaisha, kórkem ádebietke sýsaǵan qazaq oqyrmany aldaǵy ýaqytta mazmuny men muqabasy kelisken jańa jinaqtarmen qaýyshpaq.
