Elimizdegi tuńǵysh joǵary oqý orny sanalatyn qara shańyraq Abai atyndaǵy Qazaq ulttyq pedagogikalyq ýniversitetinde Qazaqstan halqy Assambleiasynyń kafedrasy ashyldy.
Kafedranyń ashylý saltanatyna elimizdegi etnosaralyq kelisimdi, qoǵamdaǵy toleranttylyqty jáne halyq birligin odan ári nyǵaitý úshin qolaily jaǵdai jasaýǵa septigin tigizip kele jatqan QHA músheleri men etnomádeni ortalyqtardyń ókilderi, ýniversitet basshylyǵy jáne stýdentter qatysty.
Jalpy alǵanda, Assambleianyń negizgi mindeti – etnosaralyq qatynastar salasynda memlekettik organdarmen jáne azamattyq qoǵam institýttarymen ózara tiimdi is-qimyldy qamtamasyz etý, qazaqstandyq qoǵamynyń negiz qalaýshy qundylyqtary boiynsha qoǵamdyq kelisimdi qoldaý jáne damytý, sonymen qatar etnomádeni birlestikterdiń kúsh biriktirýine jáne Qazaqstan halqynyń ulttyq mádenietteri, tilderi men dástúrleriniń órkendep, saqtalýyna úles qosý ekenin jaqsy bilemiz.
Osy oilardy tilge tiek etken QHA Tóraǵasynyń orynbasary, Assambleia hatshylyǵynyń meńgerýshisi L.A.Prokopenko quttyqtaý lebizin bildire otyryp, kafedraǵa kitaptar toptamasyn syiǵa tartty. Sonymen qatar Abai atyndaǵy QazUPÝ rektory T.O.Balyqbaev jáne Qazaqstan halqy Assambleiasy kafedralar qaýymdastyǵynyń prezidenti A.A.Bashmakov ózara yntymaqtastyq jónindegi memorandýmǵa qol qoidy.
Qol qoiylǵan negizgi qujat «Qazaqstan – 2050» strategiiasy jáne Qazaqstan halqy Assambleiasynyń damý tujyrymdamasyn basshylyqqa ala otyryp, elimizde ultaralyq tatýlyqty, áleýmettik-saiasi turaqtylyqty saqtaýǵa negizdelgen sharalardy júzege asyrý arqyly bilim, ǵylym, mádeniet jáne aqparattyq keńistiktegi ózara yqpaldastyqty damytýǵa baǵyttalǵan. Odaq bólek, ǵylymi qaýymdastyq pen stýdent jastardy ultaralyq birlik pen qoǵamdyq kelisim úderisterine tolyqqandy qatysýǵa múmkindik týǵyza otyryp, azamattyq jáne mádeni kelisimderdiń tiimdi júzege asýyna yqpal etý bolyp tabylady.
Saltanatty shara «Bes áleýmettik bastama – áleýmettik birliktiń tuǵyry» taqyrybyndaǵy dóńgelek ústelde jalǵasyn tapty. Dóńgelek ústel barysynda ýniversitet rektory T.O.Balyqbaev Elbasy Nursultan Nazarbaevtyń syndarly saiasatynyń negizgi ustyny - Qazaqstannyń damý bolashaǵy ultaralyq kelisim negizderinde jatqandyǵyn atap ótti.
«Elbasy saiasatynyń arqasynda elimizdiń árbir azamaty úshin urpaqtar sabaqtastyǵy arqyly jetken tatýlyq, birlik, senim men teń quqylyq mańyzdy qasietter bolyp tabylady. 1995 jyly Memleket basshysynyń jarlyǵymen qurylǵan Qazaqstan halqy Assambleiasy qazirgi tańda el birliginiń altyn arqaýyna ainaldy. Jiyrma jyldan astam ýaqyt ishinde Qazaqstan halqy Assambleiasynyń qoǵamdaǵy uiymdastyrýshylyq áleýeti tolysty. El diplomatiiasynyń mańyzdy bir bóligine ainaldy. Sonymen qatar Assambleia ǵylymi usynystar men jastarǵa bilim berý máselesine erekshe kóńil bólip keledi. Elimizdiń bilim berý oryndarynda Assambleianyń ǵylymi saraptamalyq keńesi, kafedralary jumys isteidi. Abai atyndaǵy QazUPÝ qabyrǵasynda taǵy bir kafedranyń ashylýy stýdentter arasynda tatýlyq pen birlikti, dostyqty nyǵaitýǵa qyzmet etedi dep oilaimyn. Búgingi kúni ýniversitette otyz besten asa ult ókilderiniń balalary bilim alýda» dep atap ótken ýrektor kafedra meńgerýshiligine taǵaiyndalǵan tarih ǵylymynyń doktory, professor G.V.Kanǵa quttyqtaý lebizin bildirdi.
Kelesi sóz kezegin alǵan QHA Tóraǵasynyń orynbasary, Assambleia hatshylyǵynyń meńgerýshisi L.A.Prokopenko kafedranyń ashylýy on jyl aiasynda jumys istep kele jatqan QHA kafedralar qaýymdastyǵy úshin úlken jetistik ekenin basa aitty. Sebebi, osy kafedrada bilim alatyn bolashaq pedagogtar erteńgi kúni elimizdiń barlyq aimaqtaryna bilim berýge attana otyryp, el bolashaǵynyń, onyń rýhani jańǵyrýynyń bastamashysy bolady ári jańa kafedra QHA janyndaǵy «Jańǵyrý joly» jastar qozǵalysy jumysynyń jandanýyna yqpal etetinin tilge tiek etti.
Búginde bul qozǵalystyń aldynda rýhani jańǵyrý baǵdarlamasyn júzege asyrý mindeti tur. Osy oraida «Uly dala eli» sakraldy baǵdarlamasynyń alǵashqy kezeńi - «Qamqor» aktsiiasy 9 mamyrda ótse, 31 mamyrda «Taǵzym» aktsiiasy josparlanyp otyr. Al 14 maýsymda QHA elimizdiń sakraldy aimaqtarynda tanymdyq baǵdarlamalardy júzege asyryp, tarihi-mádeni málimetterdi jinaýǵa at salysatyn bolady.
Assambleianyń aldynda turǵan negizgi mindet rýhani jańǵyrý baǵdarlamasyn júzege asyrý ekendigine toqtalǵan QHA kafedralar qaýymdastyǵynyń prezidenti A.A.Bashmakov búginde oqý oryndarynda jumys isteitin QHA-nyń qyryqqa jaýyq kafedrasy elimizdegi ultaralyq tatýlyq pen birlikti nyǵaitýǵa, Memleket basshysy alǵa qoiǵan mindetterdi júzege asyrýǵa qyzmet etetinin aitty. Jańa ashylǵan kafedranyń meńgerýshisi G.V.Kan barlyq etnikalyq ókildikter úshin esikteriniń árqashan ashyq ekenin de qosa ketti.
Odan keiin quttyqtaý lebizderin bildirgen Túrik etnomádeni ortalyǵy tóraǵasynyń orynbasary Sh.A.Asiev, Evrei etnomádeni birlestiginiń tóraǵasy A.I.Baron, Uiǵyr mádeni ortalyǵynyń tóraǵasy A.B.Shardinov, «Memlekettik tilge qurmet» qoǵamdyq birlestiginiń tóraiymy A.Osman, «Barbang» kúrd mádeni birlestiginiń tóraǵasy K.I.Mirzoev, stýdenttik «Birlik» Assambleiasynyń múshesi E.Kýchýmidze el birliginiń negizi tatýlyqta dei kele, qazaq halqyna qurmetterin bildirip, týǵan elimizdi birlese qasterleýge tiispiz dep atap ótti.
Elvira SERIKQYZY
