Túrkiiada Qazaqstan Respýblikasynyń Táýelsizdigi merekesin toilaý sharalary jalǵasýda, dep habarlaidy QazAqparat.
Táýelsizdik toiy 11 jeltoqsanda Qazaqstannyń Túrkiiadaǵy Elshiliginiń resmi qabyldaýymen bastaldy. Resmi qabyldaýǵa Nur-Sultan qalasy ákimdigi Memlekettik akademiialyq filarmoniiasynyń Qazaq orkestri men «Qorqyt ata» kóne aspaptar saz toby arnaiy keldi.
12 maýsymda 50-den astam qazaqstandyq ónerpaz Ankara turǵyndaryna kontsert qoidy jáne búgin Túrkiianyń eń tanymal týristik aimaǵy - Kappadokiiada óner kórsetti.
«Bul aitýly sharaǵa Túrkiiadaǵy Qazaqstan Elshiliginiń shaqyrýymen keldik. Qazaqstannyń Táýelsizdik merekesine orai, Túrkiianyń birneshe qalasynda óner kórsetý josparda bar. Ásirese, ulttyq mýzykamyzdy Kappadokiia syndy týrist kóp keletin tarihi oryndarynda nasihattaý da utymdy sheshim boldy», - dedi Memlekettik akademiialyq filarmoniianyń Qazaq orkestriniń kórkemdik jetekshisi jáne bas dirijeri Aitqali Jaiymov.
Kontserttik baǵdarlama Túrkeshtiń «Kóńilasharymen» bastaldy. Qorqyttyń «Jelmaia», Qurmanǵazynyń «Adai», Nurǵisa Tilendievtiń «Ata tolǵaýy» shyǵarmalary oryndaldy. Sonymen birge, Memlekettik filarmoniia solisi Altynbek Ábilda Abaidyń «Aittym sálem, Qalamqas» ánin shyrqady.
Aita keteiik, Memlekettik akademiialyq filarmoniiasynyń Qazaq orkestri men «Qorqyt ata» kóne aspaptar saz toby búgin Nide qalasynda, 14 jeltoqsanda - Býrsada, 16 jeltoqsan kúni Ystanbul qalasynda kontsert qoiady.
Aita keterligi, Kappadokiia – sheteldikter úshin qyzyqty Túrkiianyń týristik nysandarynyń biri. Ejelgi dáýirde jáne orta ǵasyrlarda Kappadokiia sarailarymen áigili bolǵan. Sol sarailar, jerasty qalalary, úńgirdegi úiler, túrli pishindi taýlar, jartas qýysyna oiyp salynǵan shirkeýler týristerdiń qyzyǵýshylyǵyn týdyrady.
