18 shilde – Halyqaralyq Nelson Mandela kúnine orai penitentsiarlyq mekemelerde sottalǵandarǵa arnap keskindemeden sheberlik sabaǵy uiymdastyryldy, dep habarlaidy "Ult aqparat".
Qylmystyq atqarý júiesi komiteti sharany Birikken Ulttar Uiymynyń qoldaýymen ótkizdi.
Vedomstvonyń baspasóz qyzmetiniń habarlaýynsha, sheberlik saǵaty pilottyq joba boiynsha jumys istep turǵan eki penitentsiarlyq mekemede ótken.
Onyń biri gibridti formatta uiymdastyrylyp, beinebailanys arqyly Qazaqstannyń túkpir-túkpirinen qosymsha 20 penitentsiarlyq mekeme qosylǵan.
Sheberlik sabaǵyn belgili qazaqstandyq sýretshi Ashat Ahmediarov ótkizdi.
«Óner arqyly sottalǵandar art-terapiiadan ótti. Óner – rýhani tazarýdyń bir elementi. Salynǵan sýretterdegi oilar men maqsat-tilekter shyn júrekten shyqty. Oilanýǵa negiz beretin keremet jumystar bar. Bas bostandyǵy shekteýli oryndaǵy adamnyń jan tebirenisi, alańdaityn máselesi, sezimi bar sýretterde. Eń bastysy - sýretterden erteńge degen úmit kórdim. Bul óte mańyzdy», - deidi sýretshi.
«Bul jumys BUU-nyń tutqyndarǵa qatysty minimaldy standartty erejelerimen bailanysty. Nelson Mandela tutqynda bolǵanda osy qaǵidattyń iske asýyna túrtki bolǵan desedi. Mýraldy salýǵa maǵan sottalǵandar kómektesti. Olar úshin bul ózindik psihologiialyq ońaltý boldy dep úmittenemin», - deidi qylqalam sheberi.
