Abai oblysynyń Borodýliha aýylynda 20 jastaǵy Dilnaz esimdi qyz qaza tapty. Marqumnyń ákesiniń aitýynsha, qyzǵa buryn kezdesken jigiti birneshe ret pyshaq suǵyp, asa qatygezdikpen óltirgen, dep habarlaidy ult.kz Stan.kz aqparat agenttigine silteme jasap.
Qaiǵyly oqiǵa 13 tamyzǵa qaraǵan túni bolǵan. Ákesiniń sózinshe, Dilnaz sol kúni synyptasymen birge aýyl ishinde serýendep júrgen. Keiin ol burynǵy jigitimen kezdesýge barǵan.
Marqumnyń ákesi kúdiktiniń tergeý barysynda qyzdyń ózine habarlasqanyn, keiin ekeýiniń aýyl shetinde kezdeskenin aitqanyn jetkizdi. Sózge kelgen kezde qyz jigitti urǵan, al kúdikti oǵan jaýap retinde kúsh qoldanǵan. Dilnaz jaǵdaidyń ýshyǵyp bara jatqanyn túsinip, oqiǵa ornynan ketýge tyrysqan.
Alaida ákesiniń aitýynsha, kúdikti qyzdyń sońynan qýyp jetip, qaltasynan bákisin shyǵarǵan. Ol pyshaqpen qorqytpaq bolǵanyn aitqanymen, keiin qyzǵa birneshe ret pyshaq suqqan.
Ákesiniń málimdeýinshe, Dilnazǵa barlyǵy 12 ret pyshaq jaraqaty salynǵan. Keibir jaraqattardyń tereńdigi 7,7 santimetrge deiin jetken. Kúdikti qyzdy shamamen 32 metr jerge súirep aparyp, keiin onyń syrt kiimi men telefonyn alyp, ormanǵa tastap ketken degen derek bar.
Saraptamaǵa sáikes, qyz shabýyldan keiin biraz ýaqyt tiri bolǵan. Kúdikti keiin úiine baryp, kiimderi men qylmys jasaýǵa paidalanǵan pyshaqty daladaǵy ájethanaǵa tastaǵan.
Dilnazdyń ákesi qyzdyń otbasydaǵy jalǵyz perzent bolǵanyn aitty. Ol Shákárim ýniversitetinde tarih jáne geografiia mamandyǵy boiynsha bilim alyp, ekinshi kýrsty aiaqtap, úshinshi kýrsqa ótken.
Ákesiniń sózinshe, Dilnaz ben kúdikti buǵan deiin kezdesip júrgen.
Abai oblysy politsiia departamentiniń málimetinshe, 20 jastaǵy kúdikti ustalyp, ýaqytsha ustaý izoliatoryna qamalǵan.
Qazirgi ýaqytta sotqa deiingi tergeý aiaqtalǵan. Qylmystyq is materialdarymen protseske qatysýshylar tanysyp jatyr. Bul rásim aiaqtalǵannan keiin is zańda belgilengen tártippen sotqa joldanady.
Marqumnyń ákesi istiń saralaýyna qatysty da suraqtary bar ekenin aityp, qylmysty asa qatygezdikpen jasady degen bap boiynsha quqyqtyq baǵa berilýin kútip otyrǵanyn jetkizdi.
