- «Kazakh TV» elimizdiń mádenieti, salt-dástúri, ekonomikasy jáne biregei tabiǵaty týraly tanymdyq baǵdarlamalarǵa negizgi ekpin qoiatyn bolady. Búgin Astanadaǵy «Qazmedia ortalyǵynda» QR Aqparat jáne kommýnikatsiialar ministri Dáýren Abaev tilshilerge bergen suhbatynda málim etti.
«Kazakh TV» álemniń 100-den astam elinde habar taratyp keledi. Bul biregei múmkindik, iaǵni maqsatty aýditoriia 300 million adamǵa jýyq. Osy aýditoriia úshin Qazaqstannyń brendin, jalpy elimizdi mádeniet nasihattaýda telearna mańyzdy ról atqarady»,-dedi ministr.
Sonymen qatar D. Abaev eger de osy telearnanyń tilshisi bolǵan jaǵdaida Qazaqstan tarihy týraly keńinen málimet berýge mán beretindigin atap ótti.
«Munymen qosa, Qazaqstannyń 25 jyldaǵy jetistigi týraly jobany iske asyrar edim. Atap aitqanda, Astana týraly, túrli iri jobalardyń qurylysy, «Nurly jol» baǵdarlamasy aiasyndaǵy aýqymdy jumystardy qamtyp óter edim. Iaǵni, júzege asyrýy sonshalyqty qiyn bolǵanymen, iske qosylǵan jobalardy keńinen kórsetýge tyrysamyn»,-dedi vedomstvo basshysy.
Telearnaǵa qoiylatyn birinshi talaptyń biri - elimizdi sheteldik aýditoriiaǵa keńinen tanytý. Ministrdiń sózine qaraǵanda, «Kazakh TV» arnasynda qazaqstandyq jańalyqtar 15 paiyzǵa deiin qysqartylady. Sebebi, kúndelikti jańalyqtar shetel aýditoriiasyna qyzyqty bolmaǵyndyqtan, kórermender nazaryna barynsha qyzyqty materialdar usynylady. Osy rette shet memleketterden týrister men investitsiia tartýǵa mán beriledi.
«Sondyqtan da elimizdiń mádenieti, salt-dástúri, ekonomikasy jáne biregei tabiǵaty týraly tanymdyq baǵdarlamalarǵa negizgi ekpin qoiylady. Jańa jobalar Qazaqstannyń týristik jáne investitsiialyq tartymdylyǵyn arttyrady. Ol tek shetedikterge ǵana emes, sonymen qatar elimizdiń azamattary úshin de qyzyqty bolady»,-dedi ministr.
Aita keteiik, búgin Dáýren Abaevtyń qatysýymen jańarǵan «Kazakh TV» arnasy resmi túrde iske qosyldy.
«Kazakh TV» jáne «Bilim jáne Mádeniet» arnalary bir «Kazakh TV» ataýymen taralady. Arna Qazaqstan tarihy, mádeniet, dástúr, týraly baǵdarlamalaryn kórsetilimin jalǵastyrady. Arna HotBird 13B, Galaxy 19 jáne AsiaSat 5 spýtniktik platformasynyń kómegimen qazaq jáne aǵylshyn tilderinde efirge shyǵady. Otandyq kórermenderge qazaq jáne orys tilderinde spýtniktik jáne kabeldik arnalar arqyly qoljetimdi bolady.
Jańa televiziialyq maýsymda arna kontenti sheteldik biznestiń keleshegi, biznes jáne demalys úshin týristik sektorlar múmkindigine toqtalatyn, sondai-aq Qazaqstannyń mádeni-tarihi murasyn beineleitin taqyryptyq bloktarǵa bólinip tolyǵady.
«KAZAKH TV» óziniń alǵashqy kórsetilimin 2002 jyldyń 25 qazany kúni bastady. «Habar», «Habar 24» arnalarymen qatar «Kazakh TV» arnasy «Habar» Agenttigi» AQ teleotbasynyń bir bóligi bolyp tabylady. Spýtniktik arna kómegimen álemniń 118 memleketine taraidy. Olardyń arasynda Soltústik jáne Ortalyq Amerika, Batys jáne Shyǵys Eýropa, Avstraliia jáne Muhit elderi, Soltústik Afrika, Taiaý Shyǵys, Aziia jáne Ońtústik Kavkaz elderi bar. Arna formaty - aqparattyq-tanymdyq.
.jpeg)