QR Aqparat jáne kommýnikatsiialar ministri Dáýren Abaev «Sóz bostandyǵy boiynsha Qazaqstan álem elderi ishinde nelikten 160-shy orynda tur?» degen suraqqa jaýap berdi, dep habarlaidy QazAqparat tilshisi.
«Biz bul baǵytta áli de jumys istep, úirený kerektigin jasyryp otyrǵan joqpyz. Bul - qalypty evoliýtsiialyq protsess. Qazaqstan - demokratiiany qalyptastyryp kele jatqan memleket. Táýelsizdiktiń úsh on jyldyǵynda biz josparly túrde demokratiialyq institýttardyń irgesin qalap, sonymen qatar radikaldyq stsenariilerden boiymyzdy aýlaq salǵymyz keledi. Reiting týraly aitar bolsam, sóz bostandyǵy týraly reiting - shynaiy (obektivti) emes dep esepteimin. Onyń ádistemesinde dolbar kóp», - dedi Dáýren Abaev Habar arnasyndaǵy «Ashyq dialog» baǵdarlamasynda.
Ministr óz sózi dáleldi bolýy úshin birneshe mysal keltirdi.
«Máselen, ol reitingte Meksika Qazaqstannan 12 pozitsiiaǵa joǵary. Biraq, eki myńynshy jyldan beri ol elde qatelespesem 140-qa tarta jýrnalist óltirilip, taǵy 20-sy iz-túzsiz ketken. Oilanyp qarańyz, qai elde syni maqalany jazýǵa úreilener edińiz - Qazaqstanda ma, álde bizden reitingte 12 pozitsiiaǵa joǵary elde me? Bul tizimde 42-shi orynda - Botsvana tur. Ol elde Úkimet BAQ-tyń arhivin qurtyp, memlekettik apparattyń barlyq aqparaty qupiia túrde ustalady. Al ol aqparatqa qol jetkizý jolyndaǵy kez kelgen áreket zańmen qýdalanady. Bul mysaldardy men bireýlerge teńesý nemese bizdiń artyqshylyqtarymyzdy kórsetý úshin emes, reitingtiń sýbektivtiligi men onyń esebin kórsetý úshin aityp otyrmyn», - dedi ministr.
Dáýren Abaev sonymen qatar Aqparat jáne kommýnikatsiialar ministrliginiń «BAQ týraly» zańǵa engizilgen ózgerister týraly taǵy da pikir bildirdi. Baǵdarlama júrgizýshisi óz suraǵynda «kóptegen adamdar bul ózgeristerdi shekteýdi údetý dep biledi, bálkim osy ózgerister reitingtegi 160-shy orynǵa sebepker bolyp turǵan bolar» degen suraq qoidy.
«Biz bul taqyrypty EYQU ókilderimen de, halyqaralyq uiymdarmen de birneshe ret talqylaǵan edik. Men birneshe ret kóptegen normalar jýrnalisterdiń jumysyn jeńildetýge baǵyttalǵanyn atap óttim. 200-ge tarta ózgeristiń ishinde tek birnesheýi ǵana pikirtalas týdyrǵan bolatyn. Jalpy, bul - qazirgi tańda jahandyq trend. Máselen, ótken jyly Germaniia Parlamenti jalǵan aqparat taratqany úshin jaýapkershilikti kúsheitý týraly zań qabyldady. Kóptegen syndar ol kezde de aityldy. Biraq, zań qabyldandy. Sondaǵy jazanyń qandai bolatynyn bilesiz be? Jalǵan aqparat taratqan jeke adam úshin aiyppul mólsherin 5 mln eýroǵa deiin kóbeitken. Zańdy tulǵalar mundai qylmysy úshin 50 mln eýroǵa deiin tóleidi. 50 mln eýrolyq aiyppul kez kelgen redaktsiiany bankrotqa otyrǵyza alady», - dedi Dáýren Abaev.
