Qazaqstan aqparat jáne qoǵamdyq damý ministri Dáýren Abaev 14 mamyrda ótken Úkimet otyrysynan soń prezidenttikke kandidattardy áleýmettik jelide nasihattaý máselesine qatysty suraqqa jaýap berdi. Ministr "qandai da bir kandidattyń paidasyna jelide úgit-nasihat júrgizýde másele kórip turǵan joqpyn" dedi.
Buǵan deiin Qazaqstan ortalyq sailaý komissiiasynyń múshesi Záýresh Baimoldina "Eldegi blogerler úgit-nasihat kezeńinde buqaralyq aqparat quraldary siiaqty prezidenttikke kandidattarǵa teń múmkindik berip, aqparat taratýda bárine birdei qaraý kerek" degen.
Úkimet otyrysynan soń buǵan qatysty pikir bildirgen Abaev "Kez kelgen azamat belgili bir deńgeide azamattyq pozitsiiasyn bildire alady" dedi.
- Qazaqstan zańnamasynda bloger degen túsinik joǵyn qaitalap aitam. Kez kelgen azamat zańǵa qaishy kelmese, azamattyq pozitsiiasyn erkin bildire alady. Ortalyq sailaý komissiiasymen aqyldasýymyz kerek. Biraq qiyn bolatyn siiaqty: kez kelgen azamat oiyn úiinde otyryp ta bildire alady. Bul qalaisha úgit-nasihat bolady? Muny muqiiat qarastyrý kerek, - dedi ministr.
Abaevtyń aitýynsha, daýys berýshiler ózderi qoldaityn kandidat pen onyń platformasyna qoldaý kórsete alady.
- Biraq "myna kandidatqa daýys berińizder" deý úgit-nasihat bolady, - dedi ol.
Qazaqstan zańnamasynda áleýmettik jeliler BAQ-qa teńestirilgen.
Aita keteiik, Qazaqstanda kezekten tys prezident sailaýy 9 maýsymda ótedi. Ótken aptada Ortalyq sailaý komissiiasy jeti adamdy prezidenttikke kandidat retinde tirkegen:
- Sádi-Bek Túgel - "Uly dala qyrandary" respýblikalyq qozǵalysy;
- qazirgi prezident Qasym-Jomart Toqaev - "Nur Otan" partiiasy;
- Amangeldi Taspihov - Qazaqstan kásipodaqtar federatsiiasy;
- Daniia Espaeva - "Aq jol" partiiasy,
- Tóleýtai Rahymbekov - "Aýyl" partiiasy;
- Jambyl Ahmetbekov - "Qazaqstan komýnistik halyq partiiasy";
- Ámirjan Qosanov - "Ult taǵdyry" qozǵalysy.
11 mamyrda elde sailaý aldyndaǵy úgit-nasihat kezeńi bastaldy. Ol 8 maýsymǵa deiin sozylmaq.
