قازاقستان اقپارات جەنە قوعامدىق دامۋ مينيسترٸ دەۋرەن اباەۆ 14 مامىردا ٶتكەن ٷكٸمەت وتىرىسىنان سوڭ پرەزيدەنتتٸككە كانديداتتاردى ەلەۋمەتتٸك جەلٸدە ناسيحاتتاۋ مەسەلەسٸنە قاتىستى سۇراققا جاۋاپ بەردٸ. مينيستر "قانداي دا بٸر كانديداتتىڭ پايداسىنا جەلٸدە ٷگٸت-ناسيحات جٷرگٸزۋدە مەسەلە كٶرٸپ تۇرعان جوقپىن" دەدٸ.
بۇعان دەيٸن قازاقستان ورتالىق سايلاۋ كوميسسيياسىنىڭ مٷشەسٸ زەۋرەش بايمولدينا "ەلدەگٸ بلوگەرلەر ٷگٸت-ناسيحات كەزەڭٸندە بۇقارالىق اقپارات قۇرالدارى سيياقتى پرەزيدەنتتٸككە كانديداتتارعا تەڭ مٷمكٸندٸك بەرٸپ, اقپارات تاراتۋدا بەرٸنە بٸردەي قاراۋ كەرەك" دەگەن.
ٷكٸمەت وتىرىسىنان سوڭ بۇعان قاتىستى پٸكٸر بٸلدٸرگەن اباەۆ "كەز كەلگەن ازامات بەلگٸلٸ بٸر دەڭگەيدە ازاماتتىق پوزيتسيياسىن بٸلدٸرە الادى" دەدٸ.
- قازاقستان زاڭناماسىندا بلوگەر دەگەن تٷسٸنٸك جوعىن قايتالاپ ايتام. كەز كەلگەن ازامات زاڭعا قايشى كەلمەسە, ازاماتتىق پوزيتسيياسىن ەركٸن بٸلدٸرە الادى. ورتالىق سايلاۋ كوميسسيياسىمەن اقىلداسۋىمىز كەرەك. بٸراق قيىن بولاتىن سيياقتى: كەز كەلگەن ازامات ويىن ٷيٸندە وتىرىپ تا بٸلدٸرە الادى. بۇل قالايشا ٷگٸت-ناسيحات بولادى? مۇنى مۇقييات قاراستىرۋ كەرەك, - دەدٸ مينيستر.
اباەۆتىڭ ايتۋىنشا, داۋىس بەرۋشٸلەر ٶزدەرٸ قولدايتىن كانديدات پەن ونىڭ پلاتفورماسىنا قولداۋ كٶرسەتە الادى.
- بٸراق "مىنا كانديداتقا داۋىس بەرٸڭٸزدەر" دەۋ ٷگٸت-ناسيحات بولادى, - دەدٸ ول.
قازاقستان زاڭناماسىندا ەلەۋمەتتٸك جەلٸلەر باق-قا تەڭەستٸرٸلگەن.
ايتا كەتەيٸك, قازاقستاندا كەزەكتەن تىس پرەزيدەنت سايلاۋى 9 ماۋسىمدا ٶتەدٸ. ٶتكەن اپتادا ورتالىق سايلاۋ كوميسسيياسى جەتٸ ادامدى پرەزيدەنتتٸككە كانديدات رەتٸندە تٸركەگەن:
- سەدٸ-بەك تٷگەل - "ۇلى دالا قىراندارى" رەسپۋبليكالىق قوزعالىسى;
- قازٸرگٸ پرەزيدەنت قاسىم-جومارت توقاەۆ - "نۇر وتان" پارتيياسى;
- امانگەلدٸ تاسپيحوۆ - قازاقستان كەسٸپوداقتار فەدەراتسيياسى;
- دانييا ەسپاەۆا - "اق جول" پارتيياسى,
- تٶلەۋتاي راحىمبەكوۆ - "اۋىل" پارتيياسى;
- جامبىل احمەتبەكوۆ - "قازاقستان كومۋنيستٸك حالىق پارتيياسى";
- ەمٸرجان قوسانوۆ - "ۇلت تاعدىرى" قوزعالىسى.
11 مامىردا ەلدە سايلاۋ الدىنداعى ٷگٸت-ناسيحات كەزەڭٸ باستالدى. ول 8 ماۋسىمعا دەيٸن سوزىلماق.
