Foto: otyrar.kz
Májilis depýtaty Ashat Aimaǵambetov jekemenshik mektepterdiń problemasyn aityp, dabyl qaqty, dep habarlaidy Ult.kz.
Qazir májilis depýtattarynyń óńirlerdegi halyqpen kezdesýi bastaldy. Osyǵan bailanysty Ashat Aimaǵambetov jekemenshik mektepter qandai problemalardy kótergenin aityp, feisbýkte jazba jariialady.
Birneshe jyl buryn Qazaqstanda jekemenshik mektepterdiń sany nebári 25-30 ǵana bolatyn. Búgingi kúni olardyń sany 800-den asty. Depýtattyń aitýynsha bul – Bilim jáne ǵylym ministrliginiń memlekettik tapsyrys pen jan basyna qarjylandyrýdy engizgen maqsatty saiasatynyń nátijesi.
"Osylaisha, jeke mektepter jelisi tez damyp, memleket mektepterdegi úsh aýysymdylyq máselesin, ásirese ońtústik óńirler men iri qalalarda, sheshýge múmkindik aldy. Júzdegen myń jańa oqýshy orny qurylyp, júzdegen memlekettik mektepter úsh aýysymdylyqtan qutyldy. Muny joqqa shyǵarý múmkin emes. Jeke mektepterge ártúrli kózqarastar bolýy múmkin, olardyń sapaǵa qatysty problemalary da bar, biraq mektepter arasynda alternativa men básekelestiktiń bolýy jalpy júie úshin paidaly", -degen depýtat alaida qazir jeke mektepterdiń damýy alańdaýshylyq týdyryp otyrǵanyn aitty.
Ol kóptegen mektepter, ásirese ata-analardan qosymsha qarajat almai, tek memlekettik tapsyrys esebinen jumys isteitinderi, bankrot bolýdyń az-aq aldynda turǵanyn aityp dabyl qaqty.
"Nelikten? Óitkeni memlekettik qarjylandyrý úlken keshigýlermen túsedi. Bul tek esep berý qujattaryndaǵy sandar emes – bul muǵalimderdiń jalaqysy, kommýnaldyq qyzmetter, salyqtar. Onyń ústine, kóptegen mektepter 2023 jáne 2024 jyldarǵa arnalǵan qarjylandyrýdy áli kúnge deiin tolyǵymen almady. Bul másele jekemenshik mektepterdiń jumyskerlerimen bolǵan kezdesýde ashyq kóterildi, óitkeni turaqty qarjylandyrýsyz mektepterdiń qalypty jumys isteýi múmkin emes", -dedi Aimaǵambetov.
Depýtattyń pikirinshe biyl jaǵdai odan ári nasharlaýy yqtimal.
"Jeke mektepterdi qarjylandyrý respýblikalyq biýdjetten jergilikti biýdjetke berildi. Alaida qoldaǵy aqparatqa sáikes, barlyq ákimdikter bul ózgerister týraly bilip, tiisti qarjylandyrýdy tolyǵymen bólgen joq. Qazirgi tańda keminde 80 mlrd teńgege jýyq qarajat jetispeidi. Jaqyn arada bul másele sheshilip, mektepterdiń úzdiksiz qarjylandyrylýy qamtamasyz etiledi dep úmittenemin", -dep otyr Májilis depýtaty A. Aimaǵambetov.
