Biyl 28 sáýirde Ainabulaq stansasy tusynda Túrksib temirjoly eki jaǵynan kelip túiskenine 90 jyl tolyp otyr, dep habarlaidy "Ult aqparat" «Qazaqstan temir joly» AQ baspasóz qyzmetine silteme jasap.
Almatydan ońtústik jaǵynan Semeiden soltústik jaǵynan kelip jetken Túrkistan – Sibir temirjolynyń sońǵy relsin qalaý saltanatty jaǵdaida ótti. Qurylystyń sońǵy shegesi josparlanǵan merzimnen 8 ai erte qaǵyldy.
«Mine sońǵy rels juby berildi. Qasym-qaǵym sát jáne sońǵy ret qaǵyldy! Bitti! Túiisý aiaqtaldy. Soltústik pen ońtústiktiń júzdegen rels tóseýshi jumysshysy bir birlerine bettedi. Bári urandatty. Bul umytylmas sát edi. Adamdar bir birin quttyqtap, qaýyshyp jatty», - dep jazdy «Gýdok» temirjol gazeti.
«Búginde aty ańyzǵa ainalǵan Túrksibti qysqa merzim ishinde tehnikasyz tek adam kúshimen ǵana salyp shyǵýy keremet siiaqty bolyp kórinedi. Bul taýlar men ózender, shólder men betpaq dala arqyly 1,4 myń shaqyrymnan astam relsti jol. Temirjoldy Uly Jibek jolynyń jalǵasy dep sanaýǵa bolady. Onyń boiynda jańa depolar, kópirler salynyp, bailanys júiesi jolǵa qoiyldy. Qazir óskeleń urpaq Túrksibtiń tarihyn, ony salǵandardyń erligin bilýi tiis. Bul Ginnester kitabyna laiyq rekord. Túrksib qurylysshylarynyń dástúrin qazirgi jastar jalǵastyrýy kerek» - deidi «QTJ» UK» AQ Konsýltativtik keńesiniń múshesi, qurmetti temirjolshy Qaltai Sámbetov.
Sol kezde jol salýǵa kelgen myńdaǵan adam saýatyn ashyp, jolshylar, mashinister, mehanikter, bailanysshylar tehnika mamandyǵyna ie boldy.
Kóbisi temirjolshylar áýletin bastaýynda tur. Jańa jolmen Ortalyq Aziia elderine kómir, aǵash, metall jáne astyq tasyldy, keri qarai– maqta men jún artylǵan poiyzdar júre bastady. Temir jol aýyl sharýashylyǵy, taý-ken óndirisi, metallýrgiia, munai óndirisi jáne ózge de salalar úshin jańa múmkindik ashyp, aimaqtyń damýy úshin qýatty serpin berdi. Jyl saiyn Túrksibte tasymal kólemi aitarlyqtai artty. Shóldi jáne shóleitti jerlerde jańa stansalar men qalalar paida boldy. Olardyń qatarynda Jańa Semei, Shar, Jalǵyztóbe, Jarma, Aiagóz jáne ózgeleri bar.
Qazaqstan temir joly kompaniiasy Túrksib mereitoiyna arnap ár túrli is–sharalardy ótkizýdi josparlap otyr. Olardyń kópshiligi onlain, qashyqtyqtan ótkiziledi. Kelesi urpaq temir jol tarihyn esten shyǵarmaýy jáne qurmetteýi mańyzdy.
