«Sharyn shatqaly» memlekettik ulttyq tabiǵi parkiniń inspektorlary jalaqylarynyń mardymsyz ekenin aitady, dep habarlaidy QazAqparat.
Memlekettik inspektor Qazbek Qoishybaev park qurylǵaly qyzmet etip keledi.
Aitýynsha qazir qaraquiryq sany edáýir ósken. Basqa da ań-qustyń kóbeigenin kózben kórip keledi. Qorshaǵan ortany qorǵaý úshin kúndiz-tún at ústinde júredi. Baqylaidy. Jumysy ózine unaidy. Alaida bir áttegen-aiy jalaqysy tómen.
«Biz myna jumysty bastaǵan kezde ailyǵymyz 7 myń teńge boldy. Qazir 80-90 myń teńge alamyz, bul az. Bizdiki qalypty jumys emes, kún-túni júresiń», - dedi memlekettik inspektor Qazbek Qoishybaev.
Sharyn shatqalynyń aýmaǵy 127 myń gektardan asady. Ulttyq park bolyp qurylǵaly erekshe qorǵalady. Sharyn shatqalynyń taǵy bir bailyǵy janýarlar dúniesi. Sútqorektilerdiń 30-dan astam túri bar. Baýyrymen jorǵalaýshylardyń 18 túri, qosmekendilerdiń 4 túri jáne 100-den asa qus túri mekendeidi. Olardyń joiylyp ketpeýine jáne brakonerlerdiń nysanasyna ainalmaýyna 20 memlekettik inspektor jaýapty. Foto jáne beine tuzaqtar qoiylǵaly park aýmaǵynda ózge de tirshilik ieleriniń bar ekeni dáleldendi.
Sharyn shatqalynda týrizmdi damytýdyń keshendi jospary qurylǵan. Qazirgi tańda arnaiy qaýly qabyldanyp, shatqaldyń infraqurylymyn qolǵa alatyn investorlar qarastyrylýda.
«Týristik soqpaqtardy jáne de týristik oryndardy jaqsartý maqsatynda ulttyq tabiǵi parkte 2 vizit ortalyǵy, bir glemping, bir kemping, ziplain atraktsiony jáne de balalar oinaityn alańdar, sonymen qatar qonaq úi, eki qonaq úi jánede meiramhanalar jasalýǵa negizdelgen joba jasalyndy. Qazirgi ýaqytta tenderge qatysatyn investorlarmen kelissóz júrgizilýde jáne qoǵamdyq keńes talqysyna da usynamyz», - dedi «Sharyn shatqaly» memlekettik ulttyq tabiǵi parkiniń direktory Elnur Ahmetov.
75 jastaǵy almatylyq Sáýle apa shatqalǵa nemerelerin ertip kelipti. Maqsaty osy jaqut mekendi kórsetý. Osy ýaqytqa deiin talai eldi aralap kórip qaitqan zeinetker mundai keremet jer esh qaida joq deidi.
«Japoniiada boldym. Varna, Bolgariiada, Túrkiiada boldym. Atyraýda boldym. Mynandai jer esh bir memlekette joq. Osynyń bárin balalarǵa kórsetý kerek. Oqytý kerek. Bizge saqtaý kerek. Sharyn shatqalyndaǵy taýlarǵa qarap otyryp aq demalasyń, sondai ádemi. Músinderi de erekshe»,- deidi Almaty qalasynyń turǵyny Sáýle Jantýarova.
