"Novaia gazeta" bas redaktory Dmitrii Mýratov Iýrii Dýdke bergen suhbatynda Ýkraina men Resei arasyndaǵy soǵys týraly suraqtarǵa jaýap berdi, - dep habarlaidy Massaget.kz portaly.
"Maǵan úgit júrgizetinderdiń "8 jyl qaida boldyq" degen memderi unamaidy. Mundai suraq qoiǵanda, adamdar qalai jaýap bererin bilmei abdyrap qalady. Jaýaby óte qarapaiym. Biz (Reseidi aityp otyr - avt.) onda 2014 jyldan beri ne istedik? Esi durys emes snaiperdi nege jiberdik? Nege biz Donetskidegi qalalardy basyp aldyq? Rostov oblysyndaǵy Birinshi arnanyń tilshisi Chýmakovanyń Slaviansk qalasynan krestke shegelengen balany oilap tapqanyn nege maǵan eshkim túsindirmeidi? Men saǵan jaýap bereiin", - dedi Mýratov.
Onyń aitýynsha, munyń barlyǵy - qoldan istelgen dúnie.
"Ol - teledidarǵa senetin adamdardy qozdyrý úshin oilap tabylǵan nárse. Adamdar úkimet mańyzdy nárse aitady dep senip qalǵan. Al qazir bilik fashizmge qarsy kúres týraly aityp jatyr. Barlyǵy múlde bolmaǵan, aiqyshqa shegelenbegen bala men onyń anasy úshin kek alýǵa attandy. Esińe túsirshi, 2012 jyly Donetskide Eýropa chempionaty bolǵan edi ǵoi. Sol hai-tek pen mahabbatqa toly úilerdi, ǵajap stadion men aeroporty bar keremet qalany tartyp aldy ǵoi", - dep jaýap berdi redaktor.
Aita keteiik, Dmitrii Mýratov - Nobel syilyǵyn alǵan alǵashqy reseilik jýrnalist. Ol filippindik Mariia Ressamen birge "demokratiia men turaqty beibitshiliktiń alǵysharty bolyp tabylatyn sóz bostandyǵyn qorǵaýǵa kúsh salǵany úshin" osy marapatqa ie bolǵan. Nobel komitetiniń málimdemesinde Mýratovtyń "Novaia gazetanyń" qyzmetkerlerine birneshe ret qoqan-loqy jasap, birneshe jýrnalistiń óltirilýine qaramastan, onyń táýelsiz saiasatynan bas tartpaǵany aitylǵan.
Eske salaiyq, Dmitrii Reseidiń Ýkrainaǵa basyp kirýinen keiin naýryzda medalin satýǵa nietti ekenin aitqan edi. Kóp uzamai "Novaia gazeta" Ýkrainadaǵy soǵys aiaqtalǵansha jumysyn toqtatqanyn habarlady. Basylym sheshimin Roskomnadzordan ekinshi ret eskertý alǵan soń "gazet jumysyn jalǵastyra almaidy" dep túsindirdi.
