"نوۆايا گازەتا" باس رەداكتورى دميتريي مۋراتوۆ يۋريي دۋدكە بەرگەن سۇحباتىندا ۋكراينا مەن رەسەي اراسىنداعى سوعىس تۋرالى سۇراقتارعا جاۋاپ بەردٸ, - دەپ حابارلايدى Massaget.kz پورتالى.
"ماعان ٷگٸت جٷرگٸزەتٸندەردٸڭ "8 جىل قايدا بولدىق" دەگەن مەمدەرٸ ۇنامايدى. مۇنداي سۇراق قويعاندا, ادامدار قالاي جاۋاپ بەرەرٸن بٸلمەي ابدىراپ قالادى. جاۋابى ٶتە قاراپايىم. بٸز (رەسەيدٸ ايتىپ وتىر - اۆت.) وندا 2014 جىلدان بەرٸ نە ٸستەدٸك? ەسٸ دۇرىس ەمەس سنايپەردٸ نەگە جٸبەردٸك? نەگە بٸز دونەتسكٸدەگٸ قالالاردى باسىپ الدىق? روستوۆ وبلىسىنداعى بٸرٸنشٸ ارنانىڭ تٸلشٸسٸ چۋماكوۆانىڭ سلاۆيانسك قالاسىنان كرەستكە شەگەلەنگەن بالانى ويلاپ تاپقانىن نەگە ماعان ەشكٸم تٷسٸندٸرمەيدٸ? مەن ساعان جاۋاپ بەرەيٸن", - دەدٸ مۋراتوۆ.
ونىڭ ايتۋىنشا, مۇنىڭ بارلىعى - قولدان ٸستەلگەن دٷنيە.
"ول - تەلەديدارعا سەنەتٸن ادامداردى قوزدىرۋ ٷشٸن ويلاپ تابىلعان نەرسە. ادامدار ٷكٸمەت ماڭىزدى نەرسە ايتادى دەپ سەنٸپ قالعان. ال قازٸر بيلٸك فاشيزمگە قارسى كٷرەس تۋرالى ايتىپ جاتىر. بارلىعى مٷلدە بولماعان, ايقىشقا شەگەلەنبەگەن بالا مەن ونىڭ اناسى ٷشٸن كەك الۋعا اتتاندى. ەسٸڭە تٷسٸرشٸ, 2012 جىلى دونەتسكٸدە ەۋروپا چەمپيوناتى بولعان ەدٸ عوي. سول حاي-تەك پەن ماحابباتقا تولى ٷيلەردٸ, عاجاپ ستاديون مەن اەروپورتى بار كەرەمەت قالانى تارتىپ الدى عوي", - دەپ جاۋاپ بەردٸ رەداكتور.
ايتا كەتەيٸك, دميتريي مۋراتوۆ - نوبەل سىيلىعىن العان العاشقى رەسەيلٸك جۋرناليست. ول فيليپپيندٸك مارييا رەسسامەن بٸرگە "دەموكراتييا مەن تۇراقتى بەيبٸتشٸلٸكتٸڭ العىشارتى بولىپ تابىلاتىن سٶز بوستاندىعىن قورعاۋعا كٷش سالعانى ٷشٸن" وسى ماراپاتقا يە بولعان. نوبەل كوميتەتٸنٸڭ مەلٸمدەمەسٸندە مۋراتوۆتىڭ "نوۆايا گازەتانىڭ" قىزمەتكەرلەرٸنە بٸرنەشە رەت قوقان-لوقى جاساپ, بٸرنەشە جۋرناليستٸڭ ٶلتٸرٸلۋٸنە قاراماستان, ونىڭ تەۋەلسٸز ساياساتىنان باس تارتپاعانى ايتىلعان.
ەسكە سالايىق, دميتريي رەسەيدٸڭ ۋكرايناعا باسىپ كٸرۋٸنەن كەيٸن ناۋرىزدا مەدالٸن ساتۋعا نيەتتٸ ەكەنٸن ايتقان ەدٸ. كٶپ ۇزاماي "نوۆايا گازەتا" ۋكرايناداعى سوعىس اياقتالعانشا جۇمىسىن توقتاتقانىن حابارلادى. باسىلىم شەشٸمٸن روسكومنادزوردان ەكٸنشٸ رەت ەسكەرتۋ العان سوڭ "گازەت جۇمىسىن جالعاستىرا المايدى" دەپ تٷسٸندٸردٸ.
