QR Qorǵanys ministri Nurlan Ermekbaev Almaty garnizonyna baryp, «Aibalta - 2019» strategiialyq komandalyq-shtabtyq oqý-jattyǵýynyń ótkizilý barysymen tanysty, dep habarlaidy "Ult aqparat".
15 sáýir kúni «Kóktal» oqý-jattyǵý poligonynda «Aibalta - 2019» strategiialyq komandalyq-shtabtyq oqý-jattyǵýy bastalǵanyn buǵan deiin habarlaǵan bolatynbyz. Ol 3 mamyrǵa deiin jalǵasady.
Ministr oqý-jattyǵý aýmaǵynda áskerlerdiń praktikalyq is-qimyldaryn baiqap, poligonnyń infraqurylymdyq nysandaryn tekserdi.
«Zamanaýi qaýip-qaterlerdi eskere otyryp, áskerlerdi jaýyngerlik qyzmettiń negizderine sapaly oqytýǵa, qarý-jaraq pen áskeri tehnikanyń tiimdi qoldanylýyna, sondai-aq oqý-jattyǵýdy ótkizý kezinde qaýipsizdik sharalarynyń saqtalýyna erekshe nazar aýdardy», - delingen Qorǵanys ministrliginiń aqparatynda.
Sapar qorytyndysy boiynsha N.Ermekbaev strategiialyq komandalyq-shtabtyq oqý-jattyǵýdyń sapaly ótkizilýi men bólimshelerdiń jaýyngerlik ázirligin jáne jaýyngerlik qabiletin odan ári arttyrý boiynsha birqatar naqty tapsyrmalar berdi.
Oqý-jattyǵýǵa Qurlyq áskerleri, Áýe qorǵanysy kúshteri, Arnaiy operatsiialar kúshteri, arnaiy jáne materialdyq-tehnikalyq qamtamasyz etý áskerleriniń áskeri bólimderi men bólimsheleri tartyldy. Jalpy alǵanda, manevrge shamamen 8 myń áskeri qyzmetshi jáne 2 myńnan astam qarý-jaraq pen áskeri tehnika, onyń ishinde maidandyq jáne armiialyq aviatsiia jumyldyrylǵan.
