Qazaqstanda 2020 jyldyń qańtar-tamyzynda rezeńke jáne plastmassa buiymdary óndirisiniń kólemi 9,3 paiyzǵa artty, dep habarlaidy "Ult aqparat" www.energyprom.kz saityna silteme jasap.
Osy jyldyń 8 aiynda rezeńke jáne plastmassa buiymdary óndirisiniń kólemi 145,3 mlrd teńgeni qurap, ótken jyldyń qańtar-tamyzymen salystyrǵanda 9,3 paiyzǵa artty. Jalpy 2019 jyly óndiris kólemi jyl ishinde 15,6 paiyzǵa ósip, 244,4 mlrd teńgeni quraǵan bolatyn.
Rezeńke jáne plastmassa buiymdary óndirisi kóleminiń jartysyna jýyǵy úsh óńirge tiesili. Kósh basyndaǵy Almaty oblysy 30,1 mlrd teńgege, odan keiin Nur-Sultan qalasy 22,5 mlrd teńgege, al úshinshi orynda turǵan Almaty qalasy 18,5 mlrd teńgege buiym shyǵarǵan. Óndiristiń jyldyq eń joǵary ósimi Aqmola (+76,5 paiyz), Batys Qazaqstan (+56) jáne Mańǵystaý (+47,7) oblystarynda tirkelgen.
Ótken jyldyń qańtar-tamyzymen salystyrǵanda naqty mánde plastmassa ónimderi ǵana ósim kórsetip otyr. Atap aitqanda, úi sharýasyna qajetti plastmassa buiymdarynyń óndirisi 36,6 paiyzǵa artyp, 7 myń tonnaǵa jýyqtady. Munan bólek 17,1 myń tonna qapshyq pen sómke, 76,5 myń tonna qubyr men qubyrshek, olardyń plastmassadan jasalǵan fitingteri shyǵaryldy.
Alaida rezeńkeden jasalatyn buiymdar óndirisi kerisinshe qysqara túsken. Naqty aitqanda, qubyr men qubyrshek óndirisi 20,3 paiyzǵa, konveinerlik taspa men jetekti beldik 12,1 paiyzǵa tómendep otyr.
