QR Qarjy ministri Erulan Jamaýbaev mobildi aqsha aýdarymdary qalai zańdastyrylatynyn túsindirdi, dep habarlaidy QazAqparat.
«Qarjy ministrligi tiisti múddeli memlekettik organdarmen jáne biznes-qarjygerler qaýymdastyǵymen birlese otyryp, mobildik aýdarymdardy retteýge qatysty zań normalaryn ázirlegen bolatyn. Ol qazir Parlamenttiń qaraýynda jatyr», - degen ministr ózgeristiń mánin bylai dep túsindirdi:
«Ózderińiz bilesizder, jeke kásipkerler kásipkerlikpen ainalysqanda da, jeke aýdarymdar jasaǵanda da qarajattary bir shotta aralasyp ketip jatyr. Bul jalpy ákimshilendirýge múmkindik bermeidi. Sondyqtan biz zań aiasynda kásipkerlikpen ainalysqandardan jeke shot ashýdy talap etemiz jáne jeke aýdarymdar júrgizýge arnaiy bólek shot ustaýy kerek. Iaǵni, biz osyndai tetikterdi banktermen, biznes qaýymdastyǵymen birlesip qarastyryp jatyrmyz. Ony birtindep engizemiz», - dedi vedomstvo basshysy.
Erulan Jamaýbaev atalǵan ózgeristiń qarapaiym azamattarǵa qatysy joq ekenin qaitalap eske saldy.
«Bul jerde aita ketetin negizgi bir másele – halyq tarapynan alańdaý bolmaýy kerek. Sebebi azamattardyń qoldanyp júrgen karta shottary saqtalady. Olardyń kúndelikti ózara bir-birine aýdaryp júrgen aqshalaryna eshqandai nuqsan kelmeidi. Iaǵni, búkil protsess sol kúiinde saqtalady. Aldynda da aitqanymyzdai, mobildi aýdarymdardy fiskaldaý úshin ǵana zańǵa birtindep ózgerister engizemiz. QR Ulttyq banki jinaqtap otyrǵan málimet boiynsha, 8 aida mobildik aýdarymdar arqyly jáne internet jelisi arqyly júrgizilgen aýdarymdar men tólemderdiń jalpy kólemi 36 trln teńgeniń mańaiynda qalyptasyp otyr. Bul óte qosmaqty soma», - dedi Qarjy ministri.
