Foto: ashyq derekkóz
Qarjylyq monitoring agenttigi júktilik pen bosanýǵa bailanysty járdemaqylar men ataýly áleýmettik kómekti zańsyz taǵaiyndaý derekterin áshkereledi, dep habarlaidy Ult.kz.
2024–2025 jyldary jalpy somasy 1,2 mlrd teńge zalal keltirgen 13 qylmystyq is tergeldi. Onyń ishinde 10 is júktilikke bailanysty járdemaqyny zańsyz rásimdeýge qatysty bolsa, bul shemalardy uiymdastyrǵan 15 adam jaýapqa tartyldy.
Jalǵan jumyspen qamtý arqyly 385 júkti áielge negizsiz járdemaqy rásimdelip, memleketke 1 mlrd teńgeden astam shyǵyn keltirilgen.
-
Aqtóbe oblysynda Úmirbekova men Baimurzaeva 70 áieldi jalǵan kásipkerlikterge jumysqa ornalastyryp, 487 mln teńge jymqyrǵany úshin 6 jylǵa sottaldy.
-
Shymkentte Dúisenova uqsas shema arqyly 98 mln teńge urlap, 5 jylǵa bas bostandyǵynan aiyryldy.
Alaiaqtar júkti áielderdi arnaiy qurylǵan JK-larǵa jalǵan tirkep, ótken kúnmen joǵary kólemde áleýmettik jáne zeinetaqy aýdarymdaryn rásimdegen. Osylaisha kóterińki tólemder alýǵa jaǵdai jasaǵan.
Ataýly áleýmettik kómek boiynsha da zańsyzdyqtar anyqtaldy. 15 laýazymdy tulǵaǵa qatysty 3 qylmystyq is qozǵaldy. Bas býhgalterler áleýmettik osal topqa kirmeitin adamdardy kómek alýshylar tizimine engizip, qarjyny jalǵan tulǵalardyń shotyna aýdaryp, qolma-qol aqshaǵa ainaldyrǵan.
2023 jyldan beri qujat rásimdeý jáne áleýmettik mártebeni eGov portaly arqyly alý protsesiniń tsifrlandyrylýy mundai qylmystarǵa jol bermeitin boldy.
Agenttik Eńbek jáne halyqty áleýmettik qorǵaý ministrligine usynystar joldap, nátijesinde erejelerge ózgerister engizildi: endi járdemaqy taǵaiyndaý kezinde «ótken» kúnmen tólengen zeinetaqy jarnalary esepke alynbaidy.
