Elordada «Ýchaske» jedel aldyn alý sharasy barysynda 7 jyl boiy halyqaralyq izdeýde bolǵan qylmysker ustaldy, dep habarlaidy "Ult aqparat".
Atap aitqanda, elordanyń politsiia qyzmetkerleri Jeńis dańǵyly boiyn sholǵyndaý barysynda ózin kúdikti ustaǵan ári jeke basyn kýálandyratyn qujattary bolmaǵan azamatty toqtatqan. Onyń turǵylyqty jeri de bolmaǵany anyqtaldy. Tulǵasyn anyqtaý úshin er adam Nur-Sultan qalalyq Politsiia departamentiniń qabyldaý-taratý ornyna jetkizgen. Nátijesinde, ol 1983 jyly dúniege kelgen Qyrǵyz Respýblikasynyń azamaty ekendigi, 2013 jyldan beri halyqaralyq izdeýde bolǵany belgili boldy.
«Ustalǵan azamat qabyldaý-taratý ornyna túsken kezde ózine qatysty múldem basqa málimetter berip, aty-jónin jalǵan aitty. Júrgizilgen sharalardyń barysynda onyń kim ekendigi anyqtalyp otyr», - dedi Nur-Sultan qalalyq PD qabyldaý-taratý ornynyń bastyǵy Asqar Túrekenov.
«Ýchaske» aldyn alý sharasy ótken úsh kúnniń ishinde ýchaskelik politsiia inspektorlary 568 ákimshilik quqyq buzýshylyqty anyqtady. Olardyń qatarynda qoǵamdyq orynda ishimdik ishý, kishigirim buzaqylyq, otbasylyq-turmystyq sipattaǵy quqyqqa qaishy áreketter, menshik ieleriniń azamattardy páterlerine zańsyz tirkeýi syndy zań buzýshylyqtar bar. Sonymen qatar ýchaskelik poltsiia qyzmetkerleri osy ýaqytta ózderi qyzmet kórsetetin turǵyn úialaptary men kópqabatty úilerdiń aýmaǵynda 4 myńnan astam tekserip shyǵý jumystaryn júrgizdi.
