Úkimettiń búgingi otyrysynda Ulttyq banktiń tóraǵasy Daniiar Aqyshev "7-20-25" baǵdarlamasynyń jobasyn tanystyrdy, dep habarlaidy "Ult aqparat" QazAqparat agenttigine silteme jasap.
Bas bankirdiń aitýynsha, 7 paiyzdyq ipotekamen ainalysatyn arnaiy kompaniianyń kapitaly Ulttyq banktiń esebinen qalyptasady. Kompaniia ol aqshaǵa ekinshi deńgeili bankter bergen jańa ipotekalyq nesielerdi satyp alady.
"Jańa baǵdarlama árkimge jeńildik sharttaryn beredi. Alaida baǵdarlama masyldyqqa jol bermeýge tiis. Baǵdarlama qaryz alýshynyń tólemge qabiletti bolýyn talap etedi. Oǵan resmi kirisi bar Qazaqstan azamattary qatysa alady. Qazir banktermen jańa baǵdarlamanyń sharttary pysyqtalýda. Mysaly, úidiń baǵasy 7 million teńge bolsa, ai saiynǵy tólem 50 myń teńgeden aspaidy. Bul jalpy alǵanda jumys isteitin Qazaqstan azamattarynyń kópshiligi úshin qolaily", - dedi D.Aqyshev.
Onyń sózine qaraǵanda, búginde respýblika boiynsha turǵyn úidiń baǵasy ár alýan. Sondyqtan iri qalalar men aimaqtar boiynsha baspana baǵasyna differentsiatsiia jasalýy múmkin.
"Baǵdarlamanyń qazirgi ólshemderi ázirshe joba ekenin eskerý kerek. Bunyń barlyǵy áli memlekettik organdar men banktermen talqylanady. Sondai-aq, jergilikti atqarýshy organdarynyń pikirin estýimiz kerek", - dep atap kórsetti D.Aqyshev.
