2020 jyldyń 7 aiynda elektrtehnikalyq mashina jasaý óndirisiniń kólemi 11 paiyzǵa artty. Bul týraly Qazaqstan mashina jasaýshylarynyń VIII forýmynda QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Elektrtehnikalyq mashina jasaý salasynda da aitarlyqtai ilgerileýshilik oryn alyp, 10 jyldyń ishinde óndiris 3 esege, eksport 4 esege artty. Oqshaýlaýdyń ortasha deńgeii 75 paiyzǵa jetti. Tek 2019 jyly ǵana 5 mlrd teńgege 34 mln metr talshyqty-optikalyq kabel shyǵaryldy. Tolyqtai alǵanda, 7 aidyń ishinde elektrtehnikalyq mashina jasaý óndirisiniń kólemi 11 paiyzǵa artyp, 101,4 mlrd teńgeni qurady», - dedi ministr.
Onyń aitýynsha, biyl otandyq akkýmýliatorlar Birikken Arab Ámirlikteri men Italiia naryǵyna shyǵarylady. Jalpy bul ónim túri qazirgi ýaqytta Resei, Belarýs, Ózbekstan, Qyrǵyzstan, Qytai, Germaniia elderine jetkizilip otyr. Búginde ishki naryqtyń akkýmýliatorǵa qajettiligi 65 paiyzǵa qamtamasyz etiledi. Al ishki naryqtyń transformatorlarǵa qajettiligi 85 paiyzǵa qamtamasyz etilgen.
«Aldaǵy ýaqytta Petropavl qalasynda 5-shi transformator zaýyty iske qosylǵannan keiin jylyna 10 myń atalǵan ónim shyǵarylatyn bolady. Sol kezde ishki naryq transformatorlarmen qamtylady», - dedi Beibit Atamqulov.
