«7-20-25» baǵdarlamasynyń qatysýshylary «Nurly jer» memlekettik baǵdarlamasy boiynsha salynǵan turǵyn úidi satyp alý múmkindigin aldy, dep habarlaidy «Baspana» Ipotekalyq uiymy. Turǵyn úilerdi ótkizý qaǵidalaryna tiisti ózgerister 2019 jyldyń basynda kúshine endi.
Buǵan deiin «Nurly jer» baǵdarlamasy boiynsha salynǵan turǵyn úiler ákimdikterde kezekte turǵandar men Qazaqstan turǵyn úi qurylys jinaq bankiniń salymshylary arasynda bólinip kelgen edi.
Memlekettik turǵyn úidiń baǵalary naryqqa qaraǵanda arzan ári óńirlerde kóptep salynady. Bir sharshy metriniń baǵasy Astana, Almaty (qala mańyndaǵy aimaqtardy qosa alǵanda), Atyraý jáne Aqtaý qalalarynda 180 myń teńge, basqa óńirlerde 140 myń teńge quraidy. Mysaly, Astanada kólemi 60 sharshy metrdi quraityn eki bólmeli páterdi 10,8 mln teńgege alýǵa bolady. Ony 25 jylǵa alǵanda ai saiynǵy tólem 61 myń teńgeden aspaidy.
«7-20-25» arqyly «Nurly jer» baǵdarlamasynyń úilerin alý aitarlyqtai jeńil. Onyń bir sebebi, ákimdikke kezekke turý nemese ai saiyn depozitke aqsha jinaýdyń esh qajeti joq. Páterdi tańdap, «7-20-25» baǵdarlamasyna qatysýshy bankke turǵyn úi qunynyń 20 paiyzyn alǵashqy jarna retinde salsa jetkilikti.
«Nurly jer» baǵdarlamasynyń indikatorlaryna sáikes aǵymdaǵy jyly 20 myńǵa jýyq páter salý josparlanyp otyr. Eń kóp páter Almatyda (3170), Shymkentte (1981), Astanada (1873) jáne Qostanai oblysynda (1794) beriletin bolady.
