Qazaqstanda «7-20-25» jańa ipotekalyq baǵdarlamasy engizilgen soń, baspana naryǵy qalai ózgeredi. Bul týraly QazAqparat tilshisine sarapshylar jaýap berdi.
Qazaqstan rieltorlar qaýymdastyǵynyń vitse-prezidenti jáne «DIXI» jyljymaityn múlik agenttiginiń direktory Nina Lýkianenkonyń aitýynsha, baǵdarlama baspana qunyna aitarlyqtai yqpalyn tigizbeidi.
«Jańa baǵdarlamanyń engizilýinen baǵalardyń ózgerýi baiqalǵan joq. Sebebi, bul baǵdarlama belgili bir qaryz alýshylar men baspanalarǵa ǵana arnalǵan. Sondyqtan, baǵdarlama arqyly baspana satylymy kóbeidi dep aitýǵa da kelmeidi», - dedi Nina Lýkianenko QazAqparat tilshisine bergen suhbatynda.
Onyń aitýynsha, qazaqstandyqtar sý jańa páterdiń ǵana emes, burynyraq qoldanysqa berilgen páterlerdiń de baǵdardamasyn kútip otyr.
«Meniń bilýimshe, bul taqyryp úkimettiń deńgeide talqylanyp jatyr. Bálkim, dál osy baǵdarlama aiasynda eskirek páterlerdi alýǵa ruqsat beretin shyǵar. Qazirgi baǵdarlamanyń bir talaby - qoldanysqa jańa berilgen nysandar bolýy qajet. Sáikesinshe, jańa nysandar qalanyń shetinde ornalasqan. Sondyqtan, jańa páterler naryǵynda usynystar bar, biraq kóp emes. Barlyq óńirde derlik osyndai jaǵdai baiqalyp otyr», - dep óz sózin túiindedi ol.
Óz kezeginde Qazaqstan qurylysshylar odaǵynyń tóraǵasy Talǵat Erǵaliev jańa baspana naryǵynda páterlerdiń az ekenin jetkizdi. Odaq basshysynyń aitýynsha, turǵyn úi keshenindegi páterlerdiń 90% qurylys barysynda satylyp ketedi de, qoldanysqa berilgende 5-10% ǵana qalady.
«Sondyqtan qurylysshylarǵa 5-10% úshin bul baǵdarlamamen ainalysý tiimsiz. Daiyn páterler óte az jáne bul páterler onsyz da satylyp jatyr. Úi qurylysynyń ózi 1,5 mlrd - 5 mlrd teńge aralyǵynda baǵalanady. Bul - ekijyldyq protsess. Sondyqtan, daiyn páterdi baǵdarlama qunymen berý olarǵa tiimsiz. Páterdi satý úshin kelisimsharttar bekitý kerek, qujattardy rásimdep, bankke qosymsha qaǵazdar aparý kerek. Daiyn páterlerdi onsyz da ipoteka nemese Turǵyn úi qurylys jinaq banki arqyly satýǵa bolady. Sondyqtan da, úi salýshylar jańa baǵdarlamaǵa kele bermeidi. Eger baǵdarlama talaptaryn jeńildetse, árine basqasha bolar edi», - dep túsindirdi ol.
Sarapshynyń aitýynsha, halyqqa ekinshi, úshinshi qoldan páter satyp alýǵa ruqsat berý qajet. «Jańa páter me, eski páter me - azamattyń ózi tańdaýy kerek. Sonda jańa páterler naryǵy da qyza túsedi. Eski páterin satqan adamdar jańa páter izdei bastaidy. Áitpese, qazirgi aiaq alysy óte baiaý», - dep esepteidi Talǵat Erǵaliev.
Sondai-aq, sarapshy jańa páterlerdiń az bolýynan baǵasy qymbattap kete me dep qaýip bildiredi.
«Naryqta jańa páter az jáne olardyń baǵasy qymbattaidy. Bul naryqtyń zańy, ony men oilap tapqan joqpyn», - dedi ol.
Qazaqstan qurylysshylar odaǵy Astanada «7-20-25» baǵdarlamasymen páter alýǵa bolatyn qurylysshylar men turǵyn úi keshenderiniń tizimin usyndy.
