6,6 mln-nan astam qazaqstandyq zeinetaqy shotyn internet arqyly tekserdi, dep habarlaidy "Ult aqparat" «BJZQ» AQ baspasóz qyzmetine silteme jasap.
«BJZQ» AQ salymshylardy jeke zeinetaqy shotynyń (JZSh) jai-kúii týraly habardar etý jumysyn turaqty júrgizip keledi. Jeke zeinetaqy shotynyń jai-kúii týraly aqparatty BJZQ keńsesine kelip, sondai-aq, poshta arqyly úzindi kóshirme alýǵa jáne elektrondy tásildi paidalana otyryp bilýge bolady.
Qazirgi kezde aqparat alýdyń eń tanymal tásili – internet bailanysy. Ony 6,6 mln-nan astam salymshy tańdady (barlyq JZSh-lardyń jalpy sanynyń 54,2%). Bul rette salymshylar men alýshylar 5 762 454 shottyń jai-kúii týraly enpf.kz saityndaǵy jeke kabinet nemese ENPF uialy qosymshasy arqyly qalaǵan ýaqytynda, álemniń kez kelgen túkpirinen bile alady. Osyndai habarlaý tásilin tańdaǵandar sany bir jylda 225 125 adamǵa (4%) artty.
BJZQ-ǵa berilgen elektrondyq poshta mekenjaiyna jiberiletin úzindi kóshirmeni 853 954 adam alady. Ol shot iesine ózi tańdaǵan keste boiynsha ai saiyn, toqsan saiyn, jarty jylda bir ret nemese jyl saiyn kelip turady.
Úzindi kóshirmeni poshta arqyly alýdy áli kúnge deiin 1 297 726 adam qoldanady. Alaida poshta bailanysyn aqparat alý tásili retinde 2 939 233 salymshy men alýshy tańdaǵan 5 jyl burynǵy, iaǵni 2015 jyldyń kórsetkishimen salystyrǵanda ol 44 % azaiǵan. Aqparat alýdyń bul túrine degen qajettiliktiń edáýir tómendeginin osydan-aq kórýge bolady.
Eger salymshy JZSh-dan úzindi-kóshirmeni jylyna bir ret dástúrli poshta arqyly alýdy qalap, biraq turǵylyqty mekenjaiyn ózgertken bolsa, onda ol jaiynda qorǵa habarlaýy tiis. «Qazaqstan Respýblikasynda zeinetaqymen qamsyzdandyrý týraly» zańynda álgindei talapty mekenjaiy ózgergennen keiin 10 kún ishinde oryndaýy qajet dep kórsetilgen. Bulai bolmaǵan jaǵdaida poshta operatory zeinetaqy shotynan úzindi kóshirmeni adresatqa jetkize almai, ol qorǵa qaityp oralady. Sondyqtan BJZQ kelesi jyldan bastap habarlaý mártebesi «anyqtalmaǵan» dep belgilenetin salymshyǵa úzindi kóshirmeni jibermeidi. Qarasha aiynyń basynda mundai salymshylardyń sany zeinetaqy jarnasynyń barlyq túri boiynsha shottardyń jalpy sanynyń 1 mln-nan astamyn nemese 8,8% qurady.
Qor keńselerine «ózi kelgen kezde» aqparat berý tásili 3 029 417 adamda aiqyndalǵan. Al ótken jyly bul kórsetkish 1 938 547 ótinishti qurady. Ósim – 56,3%. Alaida bul statistikany kóbinese jańadan ashylǵan shot ieleriniń tolyqtyrǵanyn eskergen jón. Osyǵan bailanysty BJZQ zeinetaqy júiesine jańadan kelgenderge 2019 jyldan bastap mindetti zeinetaqy jarnalary boiynsha JZSh ashý úshin shart jasaýdyń qajeti joq ekenin eskertedi. Birinshi jarna túsken kezde shot avtomatty túrde ashylady. Jeke tulǵany sáikestendirý mindetti zeinetaqy jarnalaryn aýdarý kezinde tólem tapsyrmasynyń elektrondyq formatynda kórsetilgen derbes derekter (TAÁ, JSN, týǵan kúni) boiynsha júzege asyrylady. Al jeke tulǵanyń jeke basyn kýálandyratyn qoldanystaǵy qujattyń derekteri, turaqty turatyn jeri týraly barlyq qajetti málimetti BJZQ memlekettik organdardyń aqparat júiesinen alady. Mundai shotty ashý kezinde habarlaý tásili avtomatty túrde «Óz kelip, ótinish bildirgen» bolyp aiqyndalady. Iaǵni, JZSh-sy jaqynda ashylǵan barlyq salymshylarǵa BJZQ keńsesine jeke basyn kýálandyratyn qujatpen kelip, qajetti habarlaý tásilin tańdaý usynylady. Sondai-aq, muny elektrondyq tsifrlyq qoltańba bolǵan jaǵdaida enpf.kz saity arqyly qashyqtyqtan jasaýǵa bolady.
BJZQ jeke zeinetaqy shotyn kez-kelgen yńǵaily tásilmen únemi qadaǵalap otyrý qajettiligin eskertedi. Ol shotyńyzdyń únemi tolyǵyp otyratynyna kózińizdi jetkizip, bolashaq zeinetaqyńyzdy josparlaýda senimdi bolýǵa múmkindik beredi.
