Almaty qalasynyń Óńirlik kommýnikatsiialar qyzmetiniń alańyndaǵy onlain-brifing barysynda Joǵary meditsinalyq kolledjdiń direktory Svetlana Sultanǵazieva dezinfektsiia júrgizýdiń mańyzdylyǵy men aldyn alý sharalarynyń mańyzdylyǵy týraly aitty, dep habarlaidy "Ult aqparat".
Jalpyǵa ortaq oryndardyń qaýipsizdigin qamtamasyz etý maqsatynda Almatyda kireberister, balalar alańdary men aýla aýmaqtaryna aptasyna úsh ret dezinfektsiia júrgizý qyzmetine qaita kiristi.
«Barlyq uiymdarda pandemiia bastalǵannan keiin dezinfektsiialyq tonnelder qoiyldy. Biz ony saýda, oiyn-saýyq ortalyqtarynan kórip júrmiz, kóptegen nysandarda sanitaizerler, kvarts shamdary ornatylǵan, olar tek qoǵamdyq oryndarda ǵana emes, sonymen birge qoǵamdyq kólikterde de bar. Osynyń bári karantin jaǵdaiynda kerek. Sondai-aq, biz kireberister, balalar alańdary men kóshede dezinfektsiialyq jumystardyń júrgizilýin quptaimyz, sebebi epidemiialyq jaǵdaiǵa bailanysty ol jumystardyń mańyzy zor», - dedi ol.
Sonymen birge, Svetlana Sultanǵazieva koronavirýstyń aldyn alýdyń negizgi sharalary týraly eske saldy jáne turǵyndardy sanitarlyq-epidemiialyq talaptardy saqtaýǵa shaqyrdy.
«Biz koronavirýs infektsiiasyn juqtyrýdyń negizgi joly aýa tamshylary arqyly ekenin bilemiz. Sol sebepti qoǵamdyq oryndarda, kólikte betperde taǵyp, áleýmettik qashyqtyqty saqtaý – osynyń bári aldyn alý tásili bolyp tabylady. Naýqas adam túshkiredi, jóteledi, sonyń esebinen ol infektsiiany basqalarǵa taratady. Birinshi kezekte, qaýip tobynda immýniteti tómen adamdar, iaǵni, qarttar, balalar, basqa da aýrýlary bar jáne aýyr dertpen esepke alynǵan naýqastar bar», - dedi maman.
Onyń aitýynsha, koronavirýspen naýqastanǵandardyń 30 paiyzy qart adamdar. Osyǵan bailanysty ol 65 jastan asqan adamdardy tumaýǵa qarsy ekpe alýǵa, oqshaýlaný rejimin saqtap, koronavirýstyń aldyn alýdyń barlyq sharalaryn saqtaýǵa shaqyrdy.
