Biyl Nur-Sultan qalasy aýmaǵynda jumys isteýge 6 myń 117 shetel azamatyna ruqsat berildi. Atalǵan rásim halyqqa qyzmet kórsetý ortalyǵy arqyly júzege asyrylady, dep habarlaidy QazAqparat.
«Eger shetel azamaty Qazaqstanda bolý tártibin 10 kúnnen artyq buzsa, ákimshilik hattama toltyrylyp is sotqa jiberiledi. Sottyń sheshimine sáikes ol azamatqa 25 AEK kóleminde aiyppul salynady nemese elden shyǵarylady. Sondai-aq, Qazaqstanǵa 30 kúnnen artyq ýaqytqa kelgen shetel azamattaryna ýaqytsha turý múmkindigi rásimdeledi. Olar jumyspen, oqýmen, kásip etip taǵy sol siiaqty maqsatpen kelýi múmkin. Jyl basynan beri elordada 9 myńnan astam ótinim rásimdelip, ruqsat berildi», - dedi Nur-Sultan qalasy politsiia departamenti kóshi-qon qyzmeti basqarmasynyń basshysy Arman Baimuhamet atalǵan mekemede ótken brifingte.
Sondai-aq, politsiia departamentiniń ókili elordaǵa jumys izdep keletin shetel azamattaryna qulaqqaǵys jasady.
«Nur-Sultan qalasyna kelip jumys istegisi keletin shetel azamattary barlyq suraq boiynsha halyqqa qyzmet kórsetý ortalyǵyna júgine alady. Ol jerde saqtandyrý polisin rásimdeý, saýsaq izin alý jáne basqa jeke derekter tirkeledi. Jyl basynan beri halyqqa qyzmet kórsetý ortalyǵy arqyly 6 myń 117 shetel azamatyna eńbek etýge ruqsat berildi. Odan bólek, syrttan keletin eńbek migranttarynyń turǵylyqty jeri de esepke alynady», - deidi ol.
Spiker usynǵan statistikaǵa sáikes 2022 jyldyń 3 aiynda 56 myń shetel azamaty elordada turǵylyqty jerin rásimdegen.
Sonymen qatar 24 myń sheteldik turǵylyqty jerin aýystyrǵan.
