QR IIM ministriniń orynbasary Erlan Turǵymbaev málimdegendei, negizgi boljam boiynsha Aqtóbe oblysyndaǵy avtobýstyń órtenip ketýiniń sebebi otty abaisyz paidalaný bolyp otyr, dep habarlady sputniknews.kz.
"Qazirgi tańda oqiǵa ornyndaǵy jumystar aiaqtaldy. Qaza bolǵandardyń máiitteri Ózbekstanǵa jiberildi. Ol jaqta birqatar genomdyq saraptamalar júrgizilip, marqumdardyń deneleri týystaryna beriledi. Negizgi boljamǵa sáikes, otty salǵyrt paidalaný órttiń shyǵýyna sebep bolǵan. Oqiǵa ornynda dánekerleitin sham tabyldy. Sonymen qatar, tergeý kezinde bes litr benzin quiylǵan plastmassa ydystyń (avtobýsta) bolǵandyǵy anyqtaldy" — dedi Turǵymbaev.
Onyń aitýynsha tergeý organdary zardap shekkenderden jaýap alýdy 19 qańtar, juma kúni bastaǵan.
"Otty salǵyrt paidalanǵandyǵy jónindegi boljam aman qalǵandardyń túsiniktemelerimen rastalyp otyr. Avtokóliktiń qozǵaltqyshy óship qalyp, kóliktiń ishi salqyn bolǵan, sol kezde dánekerleitin sham jylytqysh retinde qoldanylǵan. Ol eki saǵattan astam ýaqyt jumys jasaidy. Sol kezde bes litrlik ydystaǵy benzin tógiledi de, ot lap etedi. Sóitip, az ýaqytta avtobýs ishindegi azamattardyń barlyǵynyń ómirin jalmaidy. Sondai-aq, jol kólik oqiǵasy nemese qandai da bir kriminaldyq jaǵdaidyń bolýy múmkin degen boljamdar tolyqtai joqqa shyǵaryldy. Oqiǵa ornyn tekserý aiaqtalǵannan keiin atalmysh avtokólikten eshqandai sýyq qarý, atys qarýy, oq-dári nemese sol oq-dárilerdiń qaldyqtary tabylmady", — dep jetkizdi QR IIM ministriniń orynbasary.
QR Densaýlyq saqtaý vitse ministri Aleksei Tsoi aýrýhanada jatqan bes azamattyń densaýlyǵy týraly aitty.
"Sanitarlyq aviatsiia arqyly jetkizilgen barlyq emdelýshiler kesheden beri tolyq tekserildi. Jalpy alǵanda, jaǵdai turaqty, olardyń árqaisysy ózderin jaqsy sezinedi. Psihologtar óte belsendi jumys jasady, óitkeni emdelýshilerdi moraldyq turǵydan qalpyna keltirý qajet boldy. Búgin jaǵdai qalypty. Zardap shekkenderdiń densaýlyǵyna eshqandai qaýip tónip turǵan joq. Olardy aýrýhanadan shyǵarýǵa bolady", — dep habarlady Tsoi.
Sondai aq, juma kúni, Astana ýaqyty boiynsha shamamen 21:00-de, órt kezinde qaza bolǵan 52 adamnyń máiitin Ózbekstan Respýblikasynyń Tótenshe jaǵdailar ministrligi Aqtóbeden Tashkentke ushaqpen alyp ketti.
"Ushaq Ózbekstanǵa kelgennen keiin, qajet bolǵan jaǵdaida, qosymsha tergeý sharalary júrgiziletin bolady. Máiitter týystaryna beriledi", — dedi Ózbekstan Respýblikasynyń Tótenshe jaǵdailar ministri Rýstam Djýraev.
Ol sondai-aq Qazaqstan tarapyna kórsetken kómegi men qoldaýy úshin alǵysyn bildirdi.
"Ózbekstan Prezidenti respýblika azamattarynyń qazasyna bailanysty úkimettik komissiia qurdy. Komissiia músheleri Aqtóbe qalasyna jiberildi, bizge munda barynsha kómek berildi. Jumys orny, kólik jedel túrde berilip, mamandardyń kómegi kórsetildi. Barlyǵy qysqa merzimde júrgizildi. Munda barlyq máseleler tolyq sheshildi: máiitti anyqtaý, kýágerlerden jaýap alý kezinde eshqandai problemalar bolǵan joq. Osyǵan bailanysty Qazaqstan Respýblikasynyń Prezidentine, Úkimeti men osy eki kún boiy bizge kómektesken barlyq ministrlikter men vedomstvolarǵa alǵys aitqym keledi. Qaiǵymyzdy bóliskenderińiz úshin rahmet", — dedi ol.
