Memleket basshysy Qasym-Jomart Toqaev Qazaqstanda bolǵan qant tapshylyǵy týraly aitty, - dep habarlaidy "Ult aqparat" Prezidenttiń baspasóz qyzmetine silteme jasap.
«Elimizdegi 4 qant zaýytynyń ekeýi Jetisýda ornalasqan. Onyń bireýi – Aqsý qant zaýyty jumys istemei tur. Zaýytty iske qosýǵa 2017 jyldan bastap oblystyq biýdjetten 12 milliard teńge jumsaldy. Alaida, seriktes investor tarapynan serpindi jumys baiqalmai otyr.
Biyl jazda elimizde qant birden qymbattap, tipti, tapshylyq týyndady. Onyń bári quzyrly organdardyń salǵyrttyǵynyń kesirinen boldy. Tipti, tiisti kadrlyq sheshimder qabyldaýymyzǵa týra keldi.
Qant salasyn damytýdyń 2026 keshendi jospary ázirlendi. Oǵan 500 milliard teńgege jýyq investitsiia salý kózdelip otyr. Aldaǵy 5 jylda ózimiz óndiretin qanttyń úlesi 7 paiyzdan 43 paiyzǵa deiin ósedi.
Jetisý oblysynda qant qyzylshasy egiletin aýmaqty 2,5 ese ulǵaityp, 15 myń gektarǵa jetkizý josparlanyp otyr. Biylǵy qant tapshylyǵy máselesi ózimizdiń sharýalardy qoldaý óte mańyzdy ekenin kórsetti. Járdem sharalary tek qazaqstandyq fermerlerdi qoldaýǵa arnalǵan.
Jalpy, biz otandyq agro sektordy qoldaý jumystaryn odan ári jalǵastyra beremiz. Sonyń arqasynda Jetisý óńiri elimizdegi qant óndiretin ortalyqtyń birine ainalady» - dedi Toqaev.
