Densaýlyq saqtaý ministrligi 5 tamyzǵa deiin jumysy jandanatyn nysandarǵa qoiylatyn sanitarlyq talaptardy ázirlep, jariialaidy. Bul týraly Úkimet basshysynyń orynbasary Eraly Toǵjanov málim etti, dep habarlaidy QazAqparat.
«Ózderińiz biletindei karantin sharalary aiaqtalǵannan keiin birinshi kezekte jumysy jandanatyn kásipkerlik sýbektileriniń aldyn ala tizimi jasalǵan bolatyn. Bul – oiyn-saýyq ortalyqtary, saýda úileri, jabyq sanattaǵy azyq-túliktik jáne azyq-túliktik emes bazarlar, balalardyń korrektsiialyq kabinetteri, bilim berý ortalyqtary, balalardy damytý ortalyqtary, toptyq úiirmeler (bes baladan aspaýy kerek), balalardyń mektepke deiingi mekemeleri (kezekshi top rejiminde jumys isteýge ruqsat), sán-salondary, kosmetikalyq qyzmet kórsetetin ortalyqtar (aldyn ala jazylý boiynsha). Aldaǵy eki aptada kásipkerliktiń osy sýbektileri kúsheitilgen daiyndyq jumystaryn júrgizýi kerek. Keshe ǵana vedomstvoaralyq komissiianyń otyrysynda osy máseleniń bárin qaradyq», - dedi ol OKQ-daǵy baspasóz máslihatynda.
Eraly Toǵjanovtyń aitýynsha, árbir nysan boiynsha sanitarlyq rejimniń naqty sharalary qabyldanatyn bolady.
«5 tamyzǵa deiin Densaýlyq saqtaý ministrligi jumysy jandanatyn nysandarǵa qoiylatyn sanitarlyq talaptardy ázirlep, jariialaidy. Ol boiynsha kásipkerlik nysandary sanitarlyq maskalyq rejim, áleýmettik qashyqtyq, sanitaizerler boiynsha talaptardy qatań saqtaýǵa mindetteledi», - dedi ol.
