دەنساۋلىق ساقتاۋ مينيسترلٸگٸ 5 تامىزعا دەيٸن جۇمىسى جانداناتىن نىساندارعا قويىلاتىن سانيتارلىق تالاپتاردى ەزٸرلەپ, جارييالايدى. بۇل تۋرالى ٷكٸمەت باسشىسىنىڭ ورىنباسارى ەرالى توعجانوۆ مەلٸم ەتتٸ, دەپ حابارلايدى قازاقپارات.
«ٶزدەرٸڭٸز بٸلەتٸندەي كارانتين شارالارى اياقتالعاننان كەيٸن بٸرٸنشٸ كەزەكتە جۇمىسى جانداناتىن كەسٸپكەرلٸك سۋبەكتٸلەرٸنٸڭ الدىن الا تٸزٸمٸ جاسالعان بولاتىن. بۇل – ويىن-ساۋىق ورتالىقتارى, ساۋدا ٷيلەرٸ, جابىق ساناتتاعى ازىق-تٷلٸكتٸك جەنە ازىق-تٷلٸكتٸك ەمەس بازارلار, بالالاردىڭ كوررەكتسييالىق كابينەتتەرٸ, بٸلٸم بەرۋ ورتالىقتارى, بالالاردى دامىتۋ ورتالىقتارى, توپتىق ٷيٸرمەلەر (بەس بالادان اسپاۋى كەرەك), بالالاردىڭ مەكتەپكە دەيٸنگٸ مەكەمەلەرٸ (كەزەكشٸ توپ رەجيمٸندە جۇمىس ٸستەۋگە رۇقسات), سەن-سالوندارى, كوسمەتيكالىق قىزمەت كٶرسەتەتٸن ورتالىقتار (الدىن الا جازىلۋ بويىنشا). الداعى ەكٸ اپتادا كەسٸپكەرلٸكتٸڭ وسى سۋبەكتٸلەرٸ كٷشەيتٸلگەن دايىندىق جۇمىستارىن جٷرگٸزۋٸ كەرەك. كەشە عانا ۆەدومستۆوارالىق كوميسسييانىڭ وتىرىسىندا وسى مەسەلەنٸڭ بەرٸن قارادىق», - دەدٸ ول وكق-داعى باسپاسٶز مەسليحاتىندا.
ەرالى توعجانوۆتىڭ ايتۋىنشا, ەربٸر نىسان بويىنشا سانيتارلىق رەجيمنٸڭ ناقتى شارالارى قابىلداناتىن بولادى.
«5 تامىزعا دەيٸن دەنساۋلىق ساقتاۋ مينيسترلٸگٸ جۇمىسى جانداناتىن نىساندارعا قويىلاتىن سانيتارلىق تالاپتاردى ەزٸرلەپ, جارييالايدى. ول بويىنشا كەسٸپكەرلٸك نىساندارى سانيتارلىق ماسكالىق رەجيم, ەلەۋمەتتٸك قاشىقتىق, سانيتايزەرلەر بويىنشا تالاپتاردى قاتاڭ ساقتاۋعا مٸندەتتەلەدٸ», - دەدٸ ول.
