Qazaqstandyq ánshi Adam-nyń «Júrek» atty áni búkil álemge tanyldy. Keiingi málimet boiynsha ánshiniń hiti áleýmettik jelilerde 5 mlrd ret tyńdalǵan, al beinebaiany 55 millionnan astam qaralym jinaǵan. Túrli áleýmettik jelide 4,5 qoldanýshy «Júrek» ánin paidalanyp, qysqa beinebaiandar túsirgen.
Álemdi óz hitimen baýrap júrgen ánshi kim?
Adam esimimen tanymal Farýh Tohtamýratov Jambyl oblysy Merki aýylynyń týmasy. Tegi - etnikalyq ózbek. Aitýynsha, ol eshqashan mýzykamen kásibi túrde ainalyspaǵan. Buǵan deiin ol qurylys boiynsha túrli jumystardy atqarǵan. Aǵasymen tenderge qatysyp, Talan Towers-tiń esikterin jasap bergen.
Degenmen, ánshi stýdent kezinde Almatynyń ártúrli meiramhanalarynda oryndaýshy bolyp nápaqa tapqanyn aitady. Tek 2019 jyldan bastap ol óner jolyna bet buryp, orys tilinde ánder shyǵarǵan. Biraq onyń eshbiri hitke ainalmaǵan, qiyndyqtardan sharshaǵan ol tipti keide mýzykany múlde tastasam ba degen oiy bolǵanyn da jasyrmady.
«Qazaq áni álemdik hit bolǵanyna rizamyn»
Ánshi óz týyndysynyń mundai fenomenge ainalǵanyna tańqalǵanyn jasyrmady. Onyń oiynsha, júrekten shyqqan án milliondardyń júregine jol taba bildi.
«Án Qazaqstanda áigili bolady dep boljadyq. Óitkeni basty aktsent osyǵan el ishine qoiyldy. Biz premera aldynda ándi tyńdaǵan dostar men týystarymyzdyń kózqarasyna nazar aýdardyq. Olardyń tańdanysy keremet, oń boldy. Biraq, bul trektiń world shazam-ǵa, álemdik charttarǵa túskeni úlken tosynsyi boldy, jáne biz álemdik chartqa qazaq tregi engenine óte qýanyshtymyz», - deidi ol.
Ol ózin qaitpas qaisar adam dep esepteidi. Iaǵni birdeńeni qolǵa alsa, eshqashan sony sońyna deiin jetkizbei qoimaidy. Hit ánderdiń shyǵýyna osy qasieti kómekteskenine senimdi.
«Meniń boiymda eki adam ómir súredi. Bireýi – Farýh, bireýi – Adam. Farýh Adam-ǵa án jazady, ony alǵa súireidi», - deidi ánshi.
Farýh buǵan deiin de oryssha ánder jazyp, oryndap kelgen. Alaida dál qazaqsha áni osylai álemdik hitke ainalǵanyna dán riza.
Án aitýmen qatar Adam jylqy asyraidy eken. Bul onyń jan qalaýy, ári tiimdi biznes ekenin jasyrmady.
Eýropaǵa týr
Alda Adam Eýropa men Aziiaǵa gastroldik saparǵa attanbaq. Bul onyń Eýropaǵa tuńǵysh sapary, ári birden gastroldik sapar. Endi ánshi Gannover, Dýblin, Madrid, Barselona, Italiia qalalarynda án shyrqaidy.
Qazirde ánshiniń hiti Evropa+ chartyna qosylǵan, osylaisha 67 elde qazaqtyń "Júrek" áni shyrqalýda.
