QR Premer-Ministriniń orynbasary Eraly Toǵjanovtyń tóraǵalyǵymen ótken Vedomstvoaralyq komissiianyń otyrysynda elimizdegi jalpy bilim berý mektepterinde sanitarlyq normalardyń saqtalýy talqylandy, dep habarlaidy "Ult aqparat".
QR Densaýlyq saqtaý vitse-ministri – QR Bas memlekettik sanitarlyq dárigeri Erlan Qiiasov oqý jylynyń basynan beri mektepterde júrgizilgen tekserý monitoringiniń qorytyndysyn baiandady. Máselen, 697 mekteptiń 134-inde sanitarlyq normalar buzylǵany anyqtalǵan. Bul rette, buzýshylyqtardyń negizgi bóligi aýyldyq mektepterde anyqtalǵan.
Tekserý kezinde, kóptegen mektepterde paidalanylǵan jeke qorǵanys quraldaryn jinaýǵa jáne joiýǵa arnalǵan arnaiy qoqys jáshikteriniń jáne mektep ishinde júrý kezinde ara qashyqtyqty saqtaýdy qamtamasyz etetin belgilerdiń bolmaǵany anyqtaldy. Sondai-aq, qyzmetkerlerdiń betperde rejimin saqtamaý faktileri anyqtaldy.
Mysalǵa, Oral qalasyndaǵy № 46 mektepte, Nur-Sultan qalasyndaǵy № 55 orta mektepte jáne Soltústik Qazaqstan oblysyndaǵy №2 Beskól orta mektebinde, Pavlodar oblysynyń Jańatilek aýylyndaǵy Haidarov atyndaǵy mektepte, Baianaýyl aýdanyndaǵy Ýynbulaq orta mektebinde muǵalimder men oqýshylarǵa termometriia júrgizilmegen.
Sondai-aq, 33 mektepte sanitaizerlerdiń jetispeýshiligi men jetkiliksiz mólsherde ekendigi anyqtaldy.
Aqmola oblysynyń eki mektebi (Makinsk qalasy № 5 OM jáne Shýchinsk qalasy № 1 OM), Mańǵystaý oblysynyń Aqtaý qalasyndaǵy «Jaisań bala» jáne «Zere» jekemenshik mektepterinde meditsina qyzmetkeri joq.
Almaty qalasynda, Aqtóbe, Aqmola, Shyǵys Qazaqstan, Batys Qazaqstan, Qostanai jáne Mańǵystaý oblystarynda 29 mektepte bakteritsidti shamdar (kvartsty) bolmaǵan.
15 mekteptiń kireberisinde ara qashyqtyqty saqtaýdy qamtamasyz etý belgileri joq (Nur-Sultan, Almaty qalalary, Aqmola, Pavlodar, Jambyl, Mańǵystaý, SQO jáne Qaraǵandy oblystary).
Qostanai oblysynda bakteritsidti shamdar men dezinfektsiialyq kilemshelerdiń bolmaýy boiynsha birqatar buzýshylyqtar anyqtaldy: Qarabalyq aýdanynyń toǵyz mektebinde, Mailin aýdanynyń tórt mektebinde jáne Altynsarin aýdanynyń 11 mektebinde.
Jiyn qorytyndysy boiynsha Premer-Ministrdiń orynbasary ákimderge buzýshylyqtardy joiý boiynsha sharalar qabyldaýdy tapsyrdy.
Biylǵy oqý jylynyń ekinshi toqsanynda mektepterdiń qyzmetin qaita bastaý týraly sheshim qabyldaý kezinde mektepterdiń daiyndyq jaǵdaiyn baǵalaý eskeriletin bolady.
Aǵymdaǵy jyldyń 5 qazanynan bastap jalpy bilim berý mektepterin erekshe tártip boiynsha jappai tekserý jumystarynyń bastalatynyn atap ótý qajet.
